Жұмыс күшінің ұтқырлығын арттыру үшін ерікті түрде қоныс аударуға жәрдемдесу жөніндегі шараларға қатысуға жұмыс іздеп жүрген адамдардың және (немесе) жұмыссыздардың, қандастардың, сондай-ақ жұмыс берушілердің құқығы бар.
Жаңа тұрғылықты жерге ерікті түрде қоныс аудару үшін басым құқық пайдаланылады:

1) он алты жастан жиырма үш жасқа дейінгі жетім балалар мен ата-анасының қамқорлығынсыз қалған балаларға арналған білім беру ұйымдарының тәрбиеленушілері мен түлектері;

2) орта, техникалық және кәсіптік, орта білімнен кейінгі, жоғары және жоғары оқу орнынан кейінгі білім беру ұйымдарының түлектері;

3) жұмыс беруші - заңды тұлғаның таратылуына не жұмыс беруші - жеке тұлға қызметінің тоқтатылуына, жұмыскерлер санының немесе штатының қысқаруына, жұмыс берушінің экономикалық жай-күйінің нашарлауына әкеп соққан өндірістер мен орындалатын жұмыстар мен көрсетілетін қызметтер көлемінің төмендеуіне байланысты босатылған адамдар.

Еңбек ұтқырлығы орталықтары жұмыспен қамтуды қамтамасыз ету үшін адамдарды жаңа тұрғылықты жерге ерікті түрде көшіруге жәрдемдеседі:

1) бір облыс шегінде - экономикалық әлеуеті төмен ауылдардан ауылдық елді мекендерге, моноқалаларға, Экономикалық даму әлеуеті жоғары аудандық (облыстық) маңызы бар қалаларға;

2) Қазақстан Республикасының ерікті түрде қоныс аударуды көздейтін көші-қон саласындағы заңнамасына сәйкес қоныс аударушылар мен қандастарды қабылдаудың өңірлік квоталары шеңберінде Қазақстан Республикасының Үкіметі айқындайтын өңірлерге жіберіледі.

Ерікті қоныс аударатын адамдарды мемлекеттік қолдау мыналарды қамтиды:

1) қызметкердің көшуі жұмыс берушінің қаражаты есебінен жүзеге асырылатын жағдайларды қоспағанда, адамдарға және олардың отбасы мүшелеріне материалдық көмек көрсету;

2) жұмыс беруші қызметкерге тұрғын үй-жай берген жағдайларды қоспағанда, жатақханаларда қызметтік тұрғын үйлер немесе бөлмелер беру;

3) жұмыс берушінің қажеттілігі болған кезде кәсіптік оқыту;

4) жаңа тұрғылықты жерінде жұмысқа орналасуға және кәсіпкерлік бастамаға жәрдемдесу;

5) жұмысқа орналасуға субсидиялар бере отырып, жұмыс күшінің ұтқырлығын арттыру үшін ерікті қоныс аудару шараларына қатысатын жұмыс берушілерде жұмысқа орналасуға жәрдемдесу.

Еңбек ұтқырлығы орталығы уәкілетті мемлекеттік орган бекітетін нысан бойынша ерікті қоныс аударуға Қатысушы Тараптармен әлеуметтік келісімшарт жасасады.
Жұмыс күшінің ұтқырлығын арттыру үшін адамдарды ерікті түрде көшіру тәртібін уәкілетті мемлекеттік орган айқындайды.