Ақсу, Қаратал аудандары мен Талдықорған қаласы оқушыларға арналған компьютерлерді қабылдап алуда

Жаңа оқу жылы індетпен күрес шараларына байланысты қашықтан оқыту режимінде басталды. Соған байланысты Алматы облысында әлеуметтік әлжуаз отбасыларының балаларына қашықтан оқуға жағдай жасау мақсатында 55 мың компьютер сатып алынады, - деп хабарлайды Алматы облысы әкімінің баспасөз қызметі.

Облыстық білім басқармасының мәліметінше, техникалық құралдардың алғашқы легі Талдықорған қаласына жеткізіле бастады. Оны  Ақсу, Қаратал аудандары мен Талдықорған қаласы қабылдап алуда. Компьютерлерді кезең-кезеңімен жеткізу жұмыстары жалғасып жатыр. Қажетті техника басқа аудан-қалаларға да берілетін болады.

Жалпы компьютер, ноутбук және планшет сияқты қажетті техникалар сатып алуға республикалық бюджеттен 8,6 млрд. теңгеден астам қаржы бөлінген.

Алматы облысы әкімінің баспасөз қызметі.