2026 жылғы 24 маусым күні Іле ауданы, Өтеген батыр ауылы, Н. Тілендиев атындағы мәдениет үйінде «Әйел&Бизнес: Жаңа Дәуір» атты Алматы облыстық әйелдер форумы өтті.
Іс-шараны Алматы облысы әкімдігінің қолдауымен облыстық кәсіпкерлер палатасы Іскер әйелдер кеңесімен бірлесіп ұйымдастырды.
Ауқымды іс-шара әйелдердің кәсіпкерлік әлеуетін арттыруға, тәжірибе алмасуға, жаңа мүмкіндіктер мен серіктестіктер орнатуға бағытталды.
Шара барысында облыс әкімінің бірінші орынбасары Қанат Есболатов құттықтау сөз сөйлеп, іскер әйелдердің өңір экономикасын дамытуға қосқан елеулі үлесін атап өтті.
Форум аясында «Әйел. Шабыт. Кәсіп» көрмесі ұйымдастырылып, әйелдердің қоғамдағы және экономикадағы рөлі, кәсіпкерлікті дамыту, көшбасшылық пен өңірлік даму мәселелері кеңінен талқыланды.
Аталған форум белсенді әйелдерді бір алаңға тоғыстырып, жаңа идеялар мен бастамалардың жүзеге асуына серпін берген маңызды кездесуге айналды.