15 тамызда түнгі сағат 2-05-те Алматы облысының ТЖД Қапшағай су қоймасының оңтүстік-батыс жағалауында моторлы қайықта алты адам қалғаны туралы хабарлама келіп түсті.
Оқиға орнына құтқарушылар дереу шықты. Келгеннен кейін алты демалушының 9 орындық моторлы пластикалық қайықпен серуендеуге кеткені белгілі болды. Олардың қайығы техникалық ақауларға байланысты су қоймасының ортасында тоқтады.
Адамдар қайықта құтқару кеудешесіз болған.
1988 жылы туған үш ер адам және үш әйел (екеуі-1999 жылы туған, біреуі 2000 жылы туған) құтқарылып, жағаға жеткізілді, медициналық көмекке мұқтаж емес еді.
Алматы облысының ТЖД судағы қауіпсіздік ережелерін еске салады:
- қараңғы түскенде және мас күйінде жүзу құралдарын пайдаланбаңыз;
- гидрокутерлерде және қайықтарда мінуге бара жатқанда, олардың жарамдылығын және бактағы бензиннің бар-жоғын тексеріңіз;
- құтқару және су төгу құралдарынсыз, сондай-ақ дауылды ауа райында жүзуге шықпаңыз;
- тек жабдықталған жағажайларда және шомылуға арналған, ресми рұқсат пен құтқару қызметі бар жерлерде шомылыңыз;
- жүзуді білмей, белден жоғары суға түспеңіз;
- суға шомылу кезінде бір-біріңізді жоғалтпаңыз;
- жағалаудан қашық жерде буи мен қоршау белгілерін жүзіп өтпеңіз;
- жақын катерлерге немесе қайықтарға жүзбеңіз;
- қайықтардан, көпірлерден және айлақтардан суға секірмеңіз;
- тым ұзақ шомылмаңыз, гипотермия және шаршау мүмкін;
- балаларды бір минутқа қараусыз қалдырмаңыз.
Алматы облысы ТЖД баспасөз қызметі