Құрметті асыл әжелер, аяулы аналар!
Ардақты арулар!
Сіздерді көктемнің жан жадыратар жылы шуағымен бірге келіп жеткен төл мерекелеріңіз - Халықаралық әйелдер күнімен шын жүректен құттықтаймын!
Әйел - ана, әйел - асыл жар, әйел - нәзіктік пен ізгіліктің, әлемдегі барлық сұлулық пен сымбаттың символы. Әйелдер қауымы - отбасының ырыс-құт, берекесі, ізгілік пен мейірімнің алтын діңгегі. Әйелдер тек отбасының ұйытқысы ғана емес, сонымен бірге, Отанымыздың бет-бейнесі, түрлі салада ерлермен иық тірестіре еңбек етіп жүрген білікті маман иелері.
Бабаларымыз қыз баласын елдің көркі деп ерекше қадірлеп, төрін ұсынған, шексіз құрмет көрсеткен. Бүгін де бұл үрдістің алтын жібі үзілген емес. Халқымыз әйелдер қауымына ілтипат білдіріп, қай салада болсын қамқорлықпен, сыйластықпен қарайды.
Алматы облысында еңбекпен есімі әйгіленген нәзік жандар өте көп. Олар отбасында да, қызметте де білім-білігімен, өнегелі істерімен танылған жауапкершілігі зор жандар. Өңірде жүрген нәзік иықтылар білім мен медицинада, мәдениет пен ғылымда, экономика мен құрылыста, кәсіпкерлік пен құқық саласында, басқа да түрлі мекемелерде абыроймен қызмет атқаруда.
"Әйелдердің қоғамдағы рөлін кеңейте түсу – мемлекетіміздің алдында тұрған негізгі міндеттің бірі", - деп Мемлекет басшысы Қасым-Жомарт Кемелұлы Тоқаев айтқандай, нәзік жандарға қолдау көрсету, қамқорлық таныту ісі қашанда жалғасын таба береді.
Құрметті арулар! Сіздерді 8 наурыз мерекесімен құттықтай отырып, отбасында мол бақыт, табыс, амандық тілеймін. Әр шаңырақта құт-береке орнасын!