Текелі қаласына мамыр айында таза ауыз су беріледі. Отыз үш мыңдай тұрғыны бар Текелі қаласына ауыз су негізінен Қора өзенінен беріліп келген. Көктем мезгілінде қар суынан, жаңбырдан өзен суы лайланып қала халқы таза суға зәру болып қалатын. «Бұл мәселе түбегейлі шешіледі» деді бүгін Қанат Бозымбаев Текелі қаласының тұрғындарымен кездесуінде. Сондай-ақ, өткен ғасырдан бері шешілмей келе жатқан экология проблемасы да оң шешімін таппақ.
Текеліде облыс әкімі осыдан бір ай бұрын болып, халықтың талап-тілектеріне орай жергілікті атқарушы билікке бірқатар тапсырма берген болатын. Бүгінгі кездесуде сол тапсырмалардың орындалуын баяндап, қаланың алдағы даму бағытын айтты, - деп хабарлайды Алматы облысы әкімінің баспасөз қызметі.
Облыс басшысы текеліліктерге күні кеше «Санлайт Инвестментс» ЖШС-мен меморандумға қол қойғанын жеткізді. Келісімге сәйкес Текелідегі зиянды қалдықтар қоймасын рекультивациялап, қойма қалдықтарын жаңадан салынатын ірі тау-кен байыту комбинатында шикізат ретінде пайдалану қолға алынбақ. Осылайша, қала шетіндегі қалдық қойма толықтай тазартылып, қаладан алыс жерге көшірілмек. Жоба 2022-2032 жылдарда іске асырылады. Бұл текеліліктердің шешімін күткен ең өзекті мәселесінің бірі болатын.
Ал, биыл темірді қалпына келтірумен айналысатын, жылдық қуаты 120 мың тонналық «Электромарганец» ЖШС зауыты іске қосылады. Оған 15,6 млрд. теңге инвестиция тартылып, 1 мыңдай жұмыс орны ашылады.
Сондай-ақ, қаладағы апатты үйлердің мәселесі де кезең-кезеңімен шешіледі. Облыс әкімінің айтуынша, Бөлтірік шешен, Қонаев, Кошевой, Төле би көшелеріндегі апатты үйлердің тұрғындарын көшіріп орналастыруға қажетті қаржы бөлуді мәслихат қарастыруда. Алдыңғы сапарда көтерілген мәселелердің ішінде бірінші, екінші Кордон тұрғындарының проблемалары да шешілген. Атап айтқанда, дәріхана пункті құрылды, Қонаев көшесінің Кошевой көшесіне бұрылысын абаттандыруға, жиырма көшені орташа жөндеуге және бірінші, екінші кордонды жарықтандыруға жобалау-сметалық құжаттамалар әзірленді. Дегенмен инвестиция тарту, жаңа жұмыс орындарын ашу ісі әлі де артта қалып келеді. Текелінің инвестиция тартуда облыстағы үлесі небары 0,2%.
- Текелідегі өндірістік аймақта бос жер жоқ, кәсіпорындардың біразы маусымдық кезеңдерде ғана жұмыс істейді, құрал-жабдықтары тозған. Мәселен, «Суффле Қазақстан» ашықты зауытында шикізат жетіспейді, таза сумен қамтуда қиындықтар бар. Сондықтан облыста арпа өсіру көлемін арттырып, зауытты өз шикізатымызбен қамтамасыз етуді тапсырамын. Кәсіпорынды таза сумен қамтуға қажетті құжаттарды тиісті мекеме жылдам дайындап бітіруі керек. Қала әкімінің бұл бағыттағы жұмысы сылбыр. Текелінің табиғи-рекреациялық әлеуеті зор, ішкі туризмді тең дамытуға болады. Ол үшін туристік инфрақұрылымды дамытудың нақты жоспары жасалуы тиіс. Қалада шағын және орта бизнесті де өркендетуге мүмкіндік мол. Соған қарамастан Текелінің облыстағы шағын және орта бизнестегі үлесі 1% ғана. «Талдықорған – Текелі» магистралды газ құбыры 2018 жылы тартылғанымен бүгінге дейін 51 жеке тұрғын үй ғана газға қосылған, - деді Қанат Бозымбаев. Басқа да олқылықтарды атап өткен облыс басшысы жұмысты жандандыруға қатысты нақты тапсырмалар берді.
Кездесуге келген тұрғындар облыс басшысына 50-ге жуық сауал қойды. Әсіресе, тұрғын үй-коммуналдық шаруашылық, жол-көлік салаларында қордаланған мәселелер көп екені байқалды.
Мәселен, бірнеше жыл бұрын бірқатар отбасы газ қостыруға жеке компаниямен келісім жасап, ақшасын төлеген, алайда үйлеріне әлі күнге құбыр тартылмаған. Текелілік құқық қорғаушылар бұл мәселені тек сот арқылы шешуге болады дейді. Облыс әкімі Қанат Бозымбаев өз орынбасары Ж.Тұяқовқа ақшасын төлесе де газ қостыра алмай жүрген отбасыларды анықтап, оларға тиісті құқықтық көмек көрсетуді тапсырды.
Наталья Хабарова ауыз су сапасын жақсарту туралы мәселе көтерді:
- Сіз өз баяндамаңызда «Текеліге таза ауыз су береміз» дедіңіз. Бірақ бұл сөзді естіп келе жатқанымызға жиырма жыл болды. Мәселе күні бүгінге дейін шешілген жоқ. Краннан «сүтті кофені» қашанғы ішіп отырамыз? Осы мәселенің қысқа мерзімде шешіп берсеңіз дейміз.
- Өткен жолы келгенде бұл мәселені естігенмін, орынбасарым проблеманы зерделеп көрді. Көктемгі су тасқыны кезінде Қора өзенінің суы лайланады. Бұл су көзіне қойылған екі насос істен шыққан. Қандай шара атқарасыздар, Жеңіс Шылбынұлы? – деп орынбасарын орнынан тұрғызды облыс әкімі.
- Қазір Шажа өзеніне қойылған бір насосқа қосымша тағы екі насос орнатамыз. Сонда қалаға ауыз су тек Шажа өзенінен берілетін болады.
- Таза ауыз су қашан беріледі, нақты айтыңызшы?
- 1 мамырда береміз, - деді Ж.Тұяқов.
Бұл сөзді естіген қала тұрғындары ду қол шапалақтады.
Текелілік Марина Шашканова егде жастағыларға лайық қоғамдық жұмысқа тұрғысы келетінін, сол сияқты қазақ тілін үйрететін тегін курсқа қатысуға ниеті екенін жеткізді. М.Шашканованы биылдан бастап зейнет жасына таяған азаматтар үшін арнайы іске қосылған «Күміс жас» жобасы бойынша жұмысқа жіберуге мүмкіндік жасалатын болды. Сол сияқты Текелідегі «Тіл» оқыту орталығында қазақ тілін тегін үйрене алатыны туралы мәлімет берілді. Жеке ісін ашқысы келетін Ш.Бегімбетовке де бизнес бастау жолдары жайлы бағыт беріледі. Сондай-ақ дәрігерлер жетіспеушілігі, тұрғын үй кезегіне тұру, қала ішілік және Текелі-Талдықорған бағытындағы қоғамдық көлік, ішкі туризмді дамыту және басқа да тақырыптарға қатысты сауалдар қойылды. Кездесуде айтылған ұсыныс-тілектердің негізінде арнайы іс-қимыл жоспары әзірленіп, БАҚ беттерінде жарияланатын болады.
Облыс әкімі Текеліге сапары барысында азаматтар үшін жеке қабылдау өткізді.
Кездесудің толық видео нұсқасын Instagram-да alm_obl_akimat парақшасынан мына сілтемеден көре аласыздар: https://www.instagram.com/tv/CcSCDpuq-h_/?igshid=YmMyMTA2M2Y=