Алматы облысында сыбайлас жемқорлыққа қарсы көшпелі ақпараттық-түсіндіру мобильді тобы іске қосылды
«Алматы облысының ішкі саясат басқармасы» ММ тапсырысы бойынша «Азаматтық бастамаларды қолдау орталығы» КеАҚ қолдауымен а.ж. 19-26 қыркүйек аралығында Қонаев қаласы мен Алматы облысының аудандарында «Құқықтық сауаттылықты арттыру және сыбайлас жемқорлықтың алдын алу және құқық бұзушылықтарға «нөлдік» төзімділікті қалыптастыруға бағытталған жоба» аясында сыбайлас жемқорлыққа қарсы көшпелі ақпараттық-түсіндіру мобильді тобы іске қосылды.
Іс-шараны өткізудегі мақсат - сыбайлас жемқорлыққа қарсы сауаттылықты арттыру және құқық бұзушылықтарға төзімділікті төмендету. Қонаев қаласынан бастау алған іс-шара облыстық 9 ауданында тақырыптық ресімделген шағын автобуста консультациялық және әртүрлі форматтағы іс-шаралармен жалғасты. Мобильді үгіт-насихат топтың құрамында Алматы облысы бойынша сыбайлас жемқорлыққа қарсы қызмет департаментінің, Мемлекеттік кірістер департаментінің, жергілікті атқарушы органдардың мемлекеттік қызметкерлері, заңгерлер, адвокаттар және БАҚ өкілдері бар. Іс-шараға келген тұрғындар мобильді топ мүшелеріне әлеуметтік, денсаулық, білім, құрылыс, тәртіп, тұрғын үй-коммуналдық мәселелері, кәсіпкерлік, жол, экология мәселелері жөнінде түйіні шешілмей тұрған сауалдарын қойып, жалпыға ортақ проблемалардың шешілуіне өз септігін тигізуде.
Мобильді топтың жұмысы аяқталған соң, сыбайлас жемқорлыққа қарсы іс-қимыл мәселелеріне арналған облыстық форум өткізу жоспарланған.