Іле ауданының әкімі Қарасаев Бағдат Әбілмәжінұлы әскери бөлім сарбаздарын мерекемен құттықтады

Іле ауданының әкімі Қарасаев Бағдат Әбілмәжінұлы әскери бөлім сарбаздарын мерекемен құттықтады. Мерекеге орай, аудан әкімі Казцик ауылындағы №16194 әскери бөліміне барды.

7 мамыр – Отан қорғаушылар күні. Бұл мереке - еліміз үшін өте қастерлі. Себебі елдің тыныштығы ең басты құндылық болса, Отанды қорғау әрбір азаматтың қасиетті парызы. Сондай-ақ, биыл Қазақстан Республикасы Қарулы Күштерінің құрылғанына 30 жыл толып отыр.

Қос мерекемен құттықтаған аудан әкімі өз сөзінде: «Ұлтаралық келісім мен тұрақтылық, достық пен ынтымақтастықтың үлкен шаңырағы – Қазақстан Республикасы мемлекеттігінің қауіпсіздігіне және оны мекендеген ұлттар мен ұлыстардың бейбіт өмір сүруіне егемен еліміздің Қорғаныс Күштері кепіл болады. Қай дәуірде болмасын, Отан қорғау – ел азаматтарының қасиетті борышы» - деді.

Салтанатты жиын барысында аудан әкімі үздік сарбаздар мен офицерлерге алғыс хат табыстап, ауданның әскери бөлімдеріне сый-сияпат жасады. Шара соңы мерекелік бағдарламамен жалғасты.