Халық санағы өтетін болады
Халық санағын жүргізу кез-келген мемлекет үшін аса маңызды іс-шара болып саналады. Халық санағының арқасында мемлекет елдегі адам санын, этникалық құрамын барынша дәлірек біледі, бұрынғы есептермен салыстырып, өзгеру серпініне талдау жасайды. Санақ нәтижесі бұдан кейінгі жақын жылдарға жоспарды айқындап, болжам жасауға негізделген басқарушылық шешімдер қабылдауға негіз болады. Қазақстанда ұлттық халық санағы әр 10 жыл сайын өткізіледі. Соңғы науқан 2009 жылы жүргізілген болса, келесі науқан 2019 жылы өтуі керек еді. Алайда санақты дайындау мен өткізуге байланысты бірқатар ұйымдастырушылық мәселелерді ескере отырып, оны 2020 жылы өткізу туралы шешім қабылданғаны да белгілі. Әлемді шарпыған коронавирустық инфекцияның таралу қауіпіне байланысты енгізілген шектеулі карантиндік шаралар ескеріле отырып санақ өткізу мерзімі 2021 жылға шегерілген болатын.
Қазақстан Республикасы Үкіметінің 2020 жылғы 16 маусымдағы «2020 жылы Қазақстан Республикасы халқының ұлттық санағын өткізу туралы» Қазақстан Республикасы Үкіметінің 2019 жылғы 19 маусымдағы № 419 қаулысына өзгерістер енгізу туралы» № 587 қаулысына сәйкес, халық санағын өткізу мерзімі 2021 жылғы 1-30 қазан аралығына белгіленді. Қазақстан Республикасы Премьер-Министрінің өкімімен 2021 жылы Қазақстан Республикасы халқының ұлттық санағын дайындау мен өткізуге байланысты ұйымдастырушылық және нұсқаушылық мәселелерді шешу жөніндегі арнайы комиссия құрылды.
2021 жылғы Ұлттық халық санағы 2 кезеңнен тұратын болады.
Ұлттық санақтың бірінші кезеңінде (2021 жылғы 1-30 маусым аралығында) санақтық аудандастыру жүргізіледі, яғни аудандастыру үшін тұратын халықты нақтылау бойынша тұрғын үйлерді және тұрғын емес ғимараттарды аралау жұмыстары жүргізіледі.Ұлттық санақтың екінші кезеңінде (2021 жылғы 1-30 қазан аралығында) негізгі халық санағы өткізіледі, ол өз кезегінде Интернет- сауалдама және жаппай сауалдамаға бөлінеді. Қазіргі санақтың ерекшелігі - халық санағының онлайн өту мүмкіндігі. Интернет сауалнама ағымдағы жылдың 1 қыркүйегінен 15 қазан аралығында өткізіледі.. Интернет-сауалнамаға кіру www.sanaq.gov.kz web-сайты арқылы жүзеге асырылады. Сайтқа кіру тәулік бойы қамтамасыз етіледі.Азаматтар, орналасқан жеріне қарамастан, виртуалды көмекшінің көмегімен санақты өздері және отбасы мүшелері үшін сауалнамалар толтыру арқылы дербес аяқтай алады. Бұл, біріншіден, санақты жедел жүргізуге, екіншіден қателікке жол бермеуге мүмкіндік береді. Ал екінші тәсілінде арнайы дайындықтан өткен интервьюер үй-үйді, пәтер-пәтерді аралап, тұрғынның айтуына сүйене отырып, мәлімет жинайды. Дәстүрлі үздіксіз санақ онлайн-санақтан өтпеген азаматтарды қамту үшін қажетті санитарлық нормаларды сақтай отырып, 2021 жылдың 1 қазанынан 30 қазанына дейін жүргізілетін болады. Азаматтардың өтініштерін қабылдау мақсатында Байланыс-орталықтары қызмет ететін болады: 1446 қалалық нөмірлер үшін қоңырау тегін, 88000800878 мобильді операторлар үшін қоңырау тегін.
Ел өміріндегі маңызды науқан ұлттық халық санағын өткізуге орай ауданымызда да бірқатар дайындық жұмыстары қолға алынды. Аудан әкімінің 2021 жылғы 16 наурыздағы «2021 жылы Еңбекшіқазақ ауданы халқының ұлттық санағын өткізуге жәрдемдесу жөніндегі ауданаралық комиссиясын құру туралы» № 18-ө Өкіміне сай халық санағын жүргізуге дайындық жөніндегі жұмыс тобы құрылып, іс-шаралар жоспары жасалынып, бекітілді. Қазіргі уақытта әкімшілік-аумақтық бірліктердің тізбесін және шекараларын нақтылау, көше атаулары мен үй, пәтер нөмірлерін ретке келтіру, аншлагтар ілу жұмыстары жүргізіліп жатыр. Үстіміздегі жылдың 4 мамырынан бастап 30 қараша аралығында халық санағын өткізуге жауапты уәкілеттілер лауазымына 21 адам жұмысқа алынды. Аталған жұмысшылар аудан елді-мекендерін аудандастыру бойынша жұмыстарын бастап кетті. Бұдан бөлек 25 мамыр мен 8 шілде аралығында жұмыс істейтін нұсқаушы-бақылаушы лауазымына 11 адам, 1 маусымнан бастап тіркеуші лауазымына 80 адам жұмысқа алынатын болады. Бұл лауазымдағы адамдардың барлығы санитарлық-эпидемиологиялық ережелерді сақтай отырып жұмыс жасайтын болады.