Жол бойындағы жарнаманы заң талаптарына сәйкес рәсімдеңіз !

Қазақстан Республикасында сыртқы (көрнекі) жарнаманы орналастыру кәсіпкерлік қызметтің маңызды бағыты болып табылады. Әсіресе, облыстық және аудандық маңызы бар автомобиль жолдарының бойында орналасқан жарнама құралдары кең аудиторияны қамтуға мүмкіндік береді. Алайда мұндай жарнаманы орналастыру заң талаптарына қатаң сәйкес жүргізілуі тиіс.

        Сыртқы жарнаманы орналастыру тәртібі Қазақстан Республикасының «Жарнама туралы» заңымен және өзге де нормативтік құқықтық актілермен реттеледі. Аталған заңның 7-бабына сәйкес жарнамаға қойылатын негізгі талаптар төмендегідей:

• жарнама шынайы, анық және тұтынушыға арнайы білімсіз түсінікті болуы тиіс;
• жарнама мемлекеттік және орыс тілдерінде таратылады, қажет болған жағдайда өзге тілдер де қолданылуы мүмкін;
• тіркелген тауар белгілері мен логотиптер түпнұсқа тілінде пайдалануға рұқсат етіледі;
• заңмен тыйым салынған тауарлар мен қызметтерді жарнамалауға жол берілмейді;
• лицензияланатын қызмет түрлері жарнамаланған жағдайда лицензия нөмірі мен оны берген органның атауы көрсетілуі қажет;
• жарнамада зорлық-зомбылықты, агрессияны, кемсітуді немесе заңға қайшы әрекеттерді насихаттауға тыйым салынады;
• жарнама ұлттық қауіпсіздікке, қоғамдық тәртіпке және азаматтардың құқықтарына зиян келтірмеуі тиіс.

        Жалпыға ортақ пайдаланылатын автомобиль жолдарының бөлінген белдеуінде жарнама объектілерін орналастыру үшін уәкілетті органнан арнайы келісім алу қажет. Бұл мемлекеттік қызмет электрондық форматта «Е-лицензиялау» жүйесі арқылы жүзеге асырылады.

        Өтініш беру кезінде:

• электрондық өтініш жолданады;
• жарнама нысанының эскизі мен орналасу схемасы қоса беріледі;
• қажетті құжаттар электрондық түрде ұсынылады;
• өтініш электрондық цифрлық қолтаңбамен куәландырылады.

       Жарнама объектілері:

• жол қозғалысы қауіпсіздігіне кедергі келтірмеуі;
• жол белгілерін және бағдаршамдарды көлегейлемеуі;
• жүргізушілердің көру мүмкіндігін шектемеуі;
• жол инфрақұрылымының қалыпты жұмыс істеуіне әсер етпеуі тиіс.

            Заң талаптары бұзылған жағдайда заңсыз орнатылған жарнама объектілері демонтаждауға жатады және жауапкершілік көзделеді.

        Сыртқы жарнаманы заң талаптарына сай орналастыру – кәсіпкерлік қызметтің тұрақтылығы мен қауіпсіздігін қамтамасыз ететін маңызды шарт. Заң нормаларын сақтау арқылы кәсіпкерлер өз бизнесін тиімді дамытып қана қоймай, қоғамдық қауіпсіздікке де үлес қосады.

         Қосымша ақпаратты тиісті мемлекеттік органдардан немесе «Е-лицензиялау» ақпараттық жүйесі арқылы алуға болады.

 

Еңбекшіқазақ ауданының жолаушылар

көлігі және автомобиль жолдары бөлімінің

 бас маманы Байғоңыр Гүлнұр Ғалымқызы