Қазақстан Республикасының Кодексі Салықтар және бюджетке төленетін басқа да міндетті төлемдер туралы (Салық кодексі)

419-бап. Шот-фактураға өзгерістер мен толықтырулар енгізу

 

1. Түзетілген шот-фактура бұрын жазылған шот-фактураға өзгерістер және (немесе) толықтырулар енгізу, тауарларды, жұмыстарды, көрсетілетін қызметтерді жеткізушіні және (немесе) алушыны ауыстыруға әкеп соқпайтын қателерді түзету қажет болған жағдайда жазып беріледі.

Түзетілген шот-фактураны жазып беру кезінде бұрын жазып берілген шот-фактура жойылады, сондай-ақ олар болған кезде қосымша шот-фактуралар жойылады.

Жойылған қосымша шот-фактураларды қалпына келтіру үшін түзетілген шот-фактураға қосымша шот-фактуралар жазылады.

2. Түзетілген шот-фактура:

1) шот-фактураларды жазып беруге осы тарауда белгіленген талаптарға сәйкес келуге;

2) мынадай ақпаратты қамтуға:

шот-фактура түзетілгені туралы белгі;

түзетілген шот-фактураның реттік нөмірі және жазып берілген күні;

күші жойылатын шот-фактураның реттік нөмірі және жазып берілген күні.

3. Қағаз тасығышта жазылған түзетілген шот-фактура бойынша тауарларды, жұмыстарды, көрсетілетін қызметтерді алушының осындай шот-фактураны алғаны туралы төменде көрсетілген растамалардың біреуінің болуы міндетті:

1) осы Кодекстің 412-бабының 12-тармағына сәйкес тауарларды, жұмыстарды, көрсетілетін қызметтерді алушының осындай шот-фактураны қолтаңбалармен және мөрмен куәландыруы;

2) Өнім берушінің тауарларды, жұмыстарды, көрсетілетін қызметтерді алушының атына осындай шот-фактураны тапсырыс хатпен жіберуі және оны алғаны туралы хабарламаның болуы;

3) тауарларды, жұмыстарды, көрсетілетін қызметтерді алушының қолы мен мөрі бар осындай шот-фактураны алғаны туралы хатының болуы:

атауы және ұйымдық - құқықтық нысанын көрсетуі бар заңды тұлғалар үшін, егер осы тұлғаның Қазақстан Республикасының заңнамасына сәйкес мөрі болуға тиіс болса;

дара кәсіпкерлер үшін-тегі, аты, әкесінің аты (егер ол жеке басты куәландыратын құжатта көрсетілсе) және (немесе) атауы бар болса.

4. Электрондық нысанда жазып берілген түзетілген шот-фактура бойынша тауарларды, жұмыстарды, көрсетілетін қызметтерді алушы осындай түзетілген шот-фактураны алған күннен бастап күнтізбелік он күн ішінде электрондық нысанда жазып берілетін шот-фактуралардың құжат айналымы тәртібіне сәйкес осындай шот-фактураны жазып беруге келіспейтінін көрсетуге құқылы.

Осы баптың ережелері осы Кодекстің 420-бабында көзделген жағдайларда қолданылмайды.

 

 

                                                                             "Жанама салықтарды әкімшілендіру бөлімі"