Елбасы Нұрсұлтан Әбішұлының тікелей тапсырмасымен ауылдық елді мекендерді қаржыландыру бойынша жұмыстар жүргізіліп жатыр. Бұл бастама «Нұр Отан» партиясының 2019 жылғы 27 ақпандағы XVІІІ съезінде талқыланып қабылданды.
Жобаның басты мақсаты – әлеуеті жоғары ауылдық елді мекендерді аймақтық стандарттар жүйесіне келтіру, ауылдардың әлеуметтік ортасын жаңғырту және өңірлерде еңбекті насихаттау.
Облыста жалпы 732 ауылдық елді мекен бар, онда өңір халқының 80%-ы тұрады, яғни 1,5 млн. адам тұрады. Оның ішінде 457 ауылдың әлеуеті жоғары және орташа, республика бойынша ең үлкен үлеске ие. 20 аудан орталығының 10-ы ауылда орналасқан.
2019-2020 жылдар аралығында әлеуметтік және инженерлік инфрақұрылымды жөндеу және қайта жаңғырту бойынша бас аяғы 95 жоба қамтылған.
Өткен жылы 7 аудандық орталығында 45 жоба жүзеге асты. Олар, ауыз су, жылу, кәріз жүйелерін, ауыл жолдарын жөндеу, абаттандыру жұмыстары.
2020 жылы «Ауыл-Ел бесігі» арнайы жобасы шеңберінде облысы бойынша 50 жоба жүзеге асуда, оның ішінде 11 жоба білім беру нысандарын күрделі жөндеуден өткізу, 2 жоба денсаулық сақтау саласында, 28-і коммуналдық шаруашылық пен жол жөндеу бойынша, 9 жоба мәдениет пен спорт саласына қатысты.
Сонымен қатар, құрылыстары 2019 жылда басталған 4 дене шынықтыру-сауықтыру кешені қолданысқа берілмек. Алакөл ауданындағы Достық ауылында аталмыш нысан өз жұмысын бастады.
2026 жылға дейін Алматы облысына «Ауыл-Ел бесігі» арнайы жобасы бойынша 150,8 млрд. теңге бөлінеді деп жоспарланнып отыр. Бұл қаражатқа 57 білім беру нысаны, 43 денсаулық сақтау орталығы, 38 мәдениет ошағын күрделі жөндеуден өткізу және 9 дене шынықтыру-сауықтыру кешені мен 39 ауылдық мәдениет үйінің құрылысы жоспарлануда.
Елбасы – Нұрсұлтан Әбішұлының игі бастамасын жүзеге асыру облыстың ауылдық елді мекендерін әлеуметтік және экономикалық тұрғыдан дамуына, ауыл жастарының спортқа қызығушылығын арттыруға, мәдениет саласын дамытуға үлкен әсерін тигізеді