9-10 мамырда «Саламатты Қазақстан» пойызы Алматы облысының Қонаев аймағына келді

"Денсаулық пойызының" мамандары ең шалғайдағы станция тұрғындарына жоғары білікті медициналық көмек көрсетуді дәстүрге айналдырды. Өткен екі күннің қорытындысы бойынша ғана Арна, Заречный, Шеңгелді ауылдарының 500-ге жуық тұрғыны медициналық және кеңес беру қызметін алды, оның 15% - балалар. Тұрғындарға жеңіл оталар жасалып, стоматологиялық көмек көрсетілді.
Шалғайдағы ауыл тұрғындары білікті: жалпы тәжірибелік дәрігер, тіс дәрігері, окулист, ЛОР, хирург, уролог, маммолог, педиатр және т.б. мамандардан тегін тексеруден өтуге мүмкіндік алды. Пойыз заманауи диагностикалық және медициналық құрал-жабдықтармен, УДЗ, рентген аппаратымен, шағын операциялық бөлмемен, зертханамен жабдықталған.
Жобаны «Самұрық-Қазына» АҚ компаниялар тобы атынан «Samruk-Kazyna Trust» әлеуметтік жобаларды дамыту қоры, Қазақстан Республикасы Денсаулық сақтау министрлігінің қатысуымен, «Қазақстан Темір жолы»АҚ ҰК - «Әлеуметтік жобалар» қорымен бірлесіп жүзеге асыруда.

Ауыл тұрғындары көрсетілген медициналық көмекке ризашылдықтарын білдіріп, қолдау көрсеткен ұйымдастырушыларға алғыстарын білдірді.

Қазақстан Республикасындағы алғашқы медициналық-санитарлық көмек бойынша үлкен зерттеу жүргізу барысында респираторлық аурулармен ауыл тұрғындарының жиі ауыратыны анықталды. Екінші орында – ас қорыту жүйесінің аурулары және үшінші орында – қан айналымы жүйесінің аурулары.