Ұйғыр аудандық ауруханасында шеберлік сыныбы өтті

Қуық асты безінің аденомасы-қуық асты безінің қатерсіз ісігі. Патология 40 жастан асқан әрбір төртінші ер адамда және 50 жастан асқан әрбір екінші адамда кездеседі. Бұрын ауру негізінен егде жастағы ер адамдарда кездесетін, қазір ол жастар арасында жиі кездеседі. Бұл ауруды емдеудің тиімді әдістерінің бірі-хирургиялық ота.

2022 жылғы 14 қазанда Алматы облысы Ұйғыр ауданында Алматы қаласындағы №4 қалалық клиникалық аурухананың уролог-дәрігері Нұрлан Бибосынұлы Қаржаубаев орталық аудандық аурухана деңгейінде алғаш рет аудандық хирургтармен бірлесіп қуық асты безінің аденомасын трансуретральды резекция (ТУР) әдісімен шеберлік сыныбын өткізді. Білікті мамандардың командалық құрамымен үш науқасқа ота жасалды.

Дәрігерлер арасындағы бұл тәжірибе алмасу біздің ауданның хирург дәрігерлері үшін де, науқастар үшін де өте құнды. Мұндай заманауи жедел емдеу әдістерін орталық аудандық аурухана деңгейінде жүргізуге болады және сол арқылы ауданның мұқтаж тұрғындарына білікті медициналық көмек көрсетуді жақсартуға болады.