«Қазақстан Республикасының жергілікті мемлекеттік басқару және өзін-өзі басқару туралы» Заңының 37 бабын, Қазақстан Республикасы «Жер Кодексінің» 84-89 бабтарын, «Мемлекеттік мүлік туралы» Заңының 6 тарауын, «Алматы қаласы мәдениет басқармасы» коммуналдық мемлекеттік мекемесінің 2025 жылғы 16 мамырдағы №03.4-12/46090СЛ,1 хаты мен «Алатау қаласының сәулет және қалақұрылысы бөлімі» мемлекеттік мекемесінің 2025 жылғы 22 қаңтардағы №44 жер учаскесінің жер таңдау актісін негізге ала отырып, Алатау қаласының әкімдігі ҚАУЛЫ ЕТЕДІ:
1. Алатау қаласының бас жоспары мен даму жобасын орындау мақсатында, хайуанаттар бағына қызмет көрсету үшін, Алатау қаласы аумағында орналасқан кадастрлық нөмірі 03-046-221-519 көлемі 133,0000 га жер учаскесін мемлекет мұқтажы үшін мәжбүрлеп иеліктен шығару жұмыстары басталсын.
- Мәжбүрлеп иеліктен шығару мерзімі 2027 жылдың 31 желтоқсанына дейін белгіленсін.
- Меншік иелері мен жер пайдаланушылардың жүгінетін орыны Алатау қаласы, Қоянқұс ауылы, Б.Момышұлы көшесі, №157/1 мекен-жайы болып белгіленсін.
- Алатау қаласы әкімінің аппараты осы қаулы қабылданған күнінен бастап үш жұмыс күні ішінде Алатау қаласы әкімдігінің интернет-ресурсы мен жергілікті бұқаралық ақпарат құралдарында жариялауды қамтамасыз етсін.
- «Алатау қаласының жер қатынастары бөлімі» мемлекеттік мекемесі:
1) меншік иелері мен жер пайдаланушыларды заңнамамен белгіленген тәртіпте жер учаскелерінің мемлекет мұқтажына мәжбүрлеп алу туралы хабардар етуді қамтамасыз етсін;
2) Қазақстан Республикасының заңнамасында қарастырылған өзге де қажетті шараларды қабылдасын.
- Осы қаулының орындалуын бақылау Алатау қаласы әкімінің салаға жетекшілік ететін орынбасарына жүктелсін.