«АНАҒА ҚҰРМЕТ!» МУЗЕЙІ БАЛАЛАР КОЛОНИЯСЫНДА КӨРМЕ ӨТКІЗДІ

Алматы қаласы бойынша Қылмыстық-атқару жүйесі департаментінің №11 мекемесіндегі сотталған балалар Алматы қаласындағы «Анаға құрмет» музейі әкелген экспонаттарды тамашалады.

Музей қызметкерлері балалар колониясына көне ыдыстар, бұрынғы замандағы батырлардың қару-жарақтары, бас киімдері және қолдан кестелеп салынған мешіт суреттері сияқты жәдігерлер әкеліп, балаларды олардың тарихымен таныстырды.

Сонымен қатар мүсінші- керамист Ғалымжан Жансеитов әрбір балаға қазақ үй тәрізді жасалған  қолөнер бұйымын тарту етті.

«Көрме ұйымдастырудағы мақсатымыз – жазалы жасөспірімдерді туған еліміздің көне тарихымен таныстырып, ата-бабаларымыз аманат еткен ұлы даланы көздің қарашығындай сақтауға, Отанға адал қызмет етуге ұмтылдыру. Олар әрбір жәдігерді көріп, өздері музей аралағандай ерекше сезімде болды»-дейді «Анаға құрмет» музейінің директоры Гүлнәр Әбіш.

Ал мүсінші-керамист Ғалымжан Жансейітов  жазалы жасөспірімдердің еркіндікке шыққан соң осындай ерекше жұмыстармен айналысып, өз еңбектерімен қоғамнан өз орындарын табатынына ықпал етуді мақсат еткенін атап өтті.