Алматыда ағаштар қандаладан тағы да екі рет өңделеді

Тұрғынның сұрағы:

Ауладағы ағаштар неліктен ақталмайтын болды? Әктің бактерицидтік қасиеті бар ғой. Бізде ешқашан ағаш қандаласы болған емес. Қазір барлық жерде қаптады. Салдарынан ағаштың қабығы құриды. Біз шешім қабылдауымыз керек, онсыз да түнгі сағат 2-де адамдарға ескертусіз өңдеу жүргізіледі. Қандала өлгенімен, адамдар сол ауамен дем алады ғой.

Алматы әкімі Ерболат Досаевтың жауабы:

Бір кездері әктеу ағаштарды өңдеудің тиімді әдісі болды. Өкінішке қарай, климат қана емес, жалпы қаланың экожүйесі өзгерді. Қала ағаштарды өңдей алмайды, өйткені өсімдіктерді қорғау және карантин институты ақтауға кеңес бермейді. 2016 жылдан бастап ағаштарды өңдеуде әк қолданылмайды. Бүгінгі күні осы мақсат үшін биологиялық өнімдер қолданылады. Биыл шілде-тамыз айларында өңдеудің тағы екі кезеңін жүргіземіз. Ол кесте бойынша түнде өткізіледі. Өңдеуді жүргізу туралы ескертуге келсек, қала тұрғындарын құлақтандыруды күшейту қажет. Әрбір ПИК, МИБ-тің чаты бар, мен оларға чаттар арқылы өңдеудің уақыты туралы ақпарат жіберуге тапсырма беремін.

Анықтама үшін:
Биыл жапырақ жейтін зиянкестер мен саңырауқұлақ ауруларының қоздырғыштарына қарсы 2,3 миллионнан астам ағаш төрт рет еселі өңдеуден өтті. Бұл үшін қауіптілігі төмен биологиялық препарат қолданылады. Бұл зиянсыз препараттар: қоршаған ортаға, адамдардың денсаулығына, жануарларға, құстарға, жәндіктерге зияны жоқ.