Құрметті Мәслихат депутаттары!

 Бүгін Мәслихат сессиясының қарауына Алматы қаласының одан әрі дамуына айтарлықтай ықпал ететін бірқатар мәселелер шығарылып отыр.

 

БІРІНШІ. Біздің Алматы бюджетіне ұсынып отырған  нақтылауларымыз, бірінші кезекте, азаматтарымыздың өтініштері мен тілектерін ескере отырып қалыптастырылған. Жыл басынан бері әртүрлі каналдар, оның ішінде «Open Almaty» қоғамдық қабылдауы мен әлеуметтік желілер арқылы, сондай-ақ менің халықпен тұрақты кездесулерім барысында Әкімдік 77 мыңнан астам өтініш қабылдады.

Сіздерге қаламыздың негізгі мәселелері мен проблемаларын шешуге бағытталған қалалық бюджетке ұсынылып отырған түзетулер туралы хабарлап өтейін.

1. Халық санының өсуі мен оқушы орындарының тапшылығын ескере отырып, білім беру саласында қосымша 14,3 млрд. теңге қарастырылуда. Бұл қаражат Наурызбай, Түрксіб және Алатау аудандарында 7 500 орындық 5 мектеп салуға (5,5 млрд. теңге), сондай-ақ 19 білім беру объектісіне
   (15 мектеп, 4 балабақша) жобалау-сметалық құжаттаманы әзірлеуге бағытталады.

Сонымен қатар, біз мұғалімдерге ғылыми дәрежелері, тәлімгерлік,  кешкі уақытта және мектепке дейінгі оқыту үшін қосымша ақы төлеу (1,7 млрд. теңге) арқылы педагогтерге қолдау көрсетеміз. Өйткені бұл шығындар қазіргі жан басына қаржыландыру шығыстарына кірмейді.

Бұдан басқа, мемлекеттік білім беру ұйымдарының жылу  бойынша берешегін өтеу үшін біз 2 млрд. теңгені коммуналдық қызметтердің ақысын төлеуге жібереміз.

2. 2. Қазіргі таңда Мемлекет басшысының тапсырмасы бойынша Алматыда 44 мыңнан астам бала 594 спорт секциясына тегін барады. Бір уақытта 56 мың
   1 179 шығармашылық үйірмеге қатысады.

Бұл бастаманы алматылықтар жақсы бағалап отырғанын айта кету қажет. «Өтініштер легі» өте көп.
Бұл 2,6 млрд. теңге сомасына кредиттік берешектің қалыптасуына себеп болды (1,7 млрд. тг. – спорт,
900 млн. тг. - мәдениет).  

Осыған байланысты, Ел Президентінің тапсырмасын орындау мақсатында біз қосымша 4,5 млрд. теңге қарастырып отырмыз. Оның 3 млрд. теңгесі спорт секцияларына және
1,5 млрд. теңгесі шығармашылық үйірмелерге бөлінеді.

Бұл ретте, ARTSPORTEDU.KZ бағдарламасының өзінде балалардың, өнім берушілердің деректерін тексеруге, мемлекеттік органдардың деректер базасымен толық интеграцияның  болмауына байланысты проблемалар бар.

 

 

Жуырда Қазақстан Республикасы Премьер-Министрі мәдениет және спорт, оқу-ағарту министрліктеріне қазіргі кемшіліктерді жойып, балаларға арналған мемлекеттік тапсырыс берудің жаңа ережелерін әзірлеуді тапсырды.

Жазғы мектеп демалысын ескере отырып, осы жылдың 1 қыркүйегіне дейін Алматы қаласы өзіне алған барлық міндеттемелерін орындайды.

3. Денсаулық сақтау саласында 6,5 млрд. теңге қарастырылған. Бұл қаражат Балалардың шұғыл медициналық көмек орталығының операциялық блогы бар қабылдау бөлімшесінің құрылысын аяқтауға (1,9 млрд. теңге), Түрксіб, Алатау, Жетісу аудандарында 4 отбасылық-дәрігерлік амбулатория салуға (850 млн. теңге), Бостандық ауданында емхана салу үшін 2 жер учаскесін (2,2 млрд. теңге) сатып алуға, 15 денсаулық сақтау объектісін салу және реконструкциялау бойынша жобалау-сметалық құжаттаманы әзірлеуге (24,4 млн. теңге) бағытталған.
4. Қаланың медициналық-әлеуметтік мекемелерінде тұратын психоневрологиялық аурулары бар адамдар мен жалғызбасты зейнеткерлер үшін тамақтану сапасын арттырып, рационның түрлерін көбейту үшін 2020 жылдан бері өзгермеген бес мезгіл тамақтану құны 1300 теңгеден
   3 000 теңгеге дейін көбейтілді.

Бұл мақсатқа қосымша 382 млн. теңге бөлінеді, жалпы сомасы 1,2 млрд. теңгені құрайтын болады.

 

 

Халықты әлеуметтік қолдауға барлығы 2,3 млрд. теңге қосымша қаражат қарастырылған.

5. Азық-түлік нарығындағы қалыптасатын жағдайды және бағаның өсуін ескере отырып, әлеуметтік маңызы бар азық-түлік тауарларына бағаны тұрақтандыру мақсатында бұрын бөлінген 11 млрд. теңгеге қосымша 4 млрд. теңге көзделген. Бұл қаражат қант, нан, ет, көкөніс пен сүт өнімдерінің бағасын тұрақтандыруға мүмкіндік береді.
6. Тұрғын үй-коммуналдық шаруашылық саласына қосымша қажеттілік 16,9 млрд. теңгені құрайды, олар негізінен «Нұрлы Жер» мемлекеттік бағдарламасы шеңберінде
   (9,7 млрд. теңге) жұмыс істейтін жастар үшін тұрғын үй сатып алуға (1050 пәтер), Наурызбай ауданының 100 мың тұрғыны үшін жылумен жабдықтау қуатын ұлғайта отырып, қазандықты кеңейту (2,4 млрд. теңге), сондай-ақ Шаңырақ -1, Алғабас шағын аудандарының 73 мың тұрғыны үшін сумен жабдықтау желілерінің құрылысын аяқтауға (1,1. млрд. теңге) бағытталатын болады.

Алматы бюджетіне ұсынылатын түзетулер аясында барлығы 88,2 млрд. теңге қосымша қаржы бөлу ұсынылады.

 

ЕКІНШІ. Сирек кездесетін аурулары бар адамдарды дәрі-дәрмекпен қамтамасыз ету мақсатында 18 нозология бойынша (103 пациент, оның 73-і бала) орфандық препараттарды сатып алуға 1 млрд. теңгеден астам (1,039 млрд. теңге) қосымша қаржыландыруға қолдау көрсетулеріңізді сұраймын. Осы мақсаттарға арналған жалпы бюджет осы жылы
7,6 млрд. теңгеге құрайды.

ҮШІНШІ. Қала тұрғындарын толғандыратын өзекті мәселелердің  бірі  қала құрылысы, мегаполисте нүктелік және тығыз құрылысқа тыйым салу болып табылады.

Осы жылдың наурыз айында Мемлекет басшысы тұрғын үй кешендерінің жанынан көпқабатты үйлердің тығыз салынуын тоқтатып, әлеуметтік инфрақұрылым, скверлер мен балалар спорт алаңдарын салуға назар аударуды тапсырды.

Осыған байланысты, Алматы әкімдігі Алматы қаласы аумағының функционалдық аймақтарын салудың қала құрылысы регламенттерін іске асырудың жаңа жоспарын әзірледі. Оны біз сарапшылар қауымдастығымен талқыладық. Бүгін Сіздердің қарауларыңызға мынадай негізгі бағыттарды ұсынамыз:

1. 9 қабатқа дейін ауыспалы қабаттар санына регламентті белгілей отырып, Абай даңғылының оңтүстігіне, Әл-Фараби даңғылының солтүстігіне, Әшімов көшесінің шығысына, Шығыс айналма автомобиль жолының шығысына қарай тұрғын үй ғимараттарының биіктігін шектеу.
2. Топырақтың инженерлік-геологиялық құрылымымен (тереңдігі 20 метрден асатын саздақтар) расталатын беткейлердің 15 градустан жоғары тік болуы және аумақтың сейсмикалығының жоғары дәрежесі көшкін жүру қаупін тудырады және арнайы іс-шараларды қажет етеді. Осыған байланысты, таудың беткейлеріне және 15 градус және одан да жоғары тік беткейлерге кез келген мақсаттағы ғимараттардың жаңа құрылысына тыйым салынады.
3. 2017 жылы Алматының Қала құрылысы кеңесі өз жұмысын тоқтатты. Осы жылдың 1 тамызынан бастап Біз оның қызметін жаңа форматта бастауды жоспарлап отырмыз, яғни тәуелсіз сарапшыларды тарту және қала құрылысы шешімдерін қабылдауда олардың рөлін арттыру көзделеді.

          Бұл үшін біз құрылыс салушыларға қойылатын міндетті талаптарды және жобаларды қоғамдық талқылаудан өткізу, сондай-ақ орналасқан жеріне қарамастан, 5 қабаттан асатын барлық ғимараттар мен құрылыстар үшін Қала құрылысы кеңесінің оң қорытындысын алу шарттарын бекітуді ұсынамыз.

4. Алматы облысының қала маңындағы жерлері қосылғаннан бері 2014 жылы Алматыға жеке қосалқы шаруашылық немесе ауыл шаруашылығы өндірісі, бау-бақша шаруашылығы, саяжай құрылысы үшін пайдаланылатын аумақтар көшті. Олардың басым бөлігі тау беткейлерінде және таулы жерлерде орналасқан.

Бұл ретте, республикалық маңызы бар қалалардың аумақтарында жерді ауыл шаруашылығы мақсаттарына пайдалану заңнамада көзделмеген. Бұл жер иелерінің бағбандық үшін ұсақ учаскелерге бөліп, одан әрі сатуына алып келді. Осылайша негізгі әлеуметтік объектілерсіз құрылыстың  бейберекет салынуына жағдай жасады.

Осыған байланысты, коллизия мен бейберекет құрылыстарды болдырмау үшін ауыл шаруашылығы мақсатындағы жер учаскелерін бөлуге тыйым салынады.

Құрметті Мәслихат депутаттары!

Сіздердің қолдауларыңызды сұраймын.