АНЫҚТАМА Алматы қаласы әкімі аппаратының «е-Өтініш» ақпараттық жүйесінде өтініштер мен тапсырмалармен жұмыс жүргізу қызметін тексеру нәтижелері бойынша

 

АНЫҚТАМА

Алматы қаласы әкімі аппаратының «е-Өтініш» ақпараттық жүйесінде өтініштер мен тапсырмалармен жұмыс жүргізу қызметін тексеру нәтижелері бойынша

 

Алматы қаласы                                                                       04.12.2025 ж.

 

Өтініштермен және өтініш берушілермен жұмыс жүргізуді регламенттейтін құжаттарға, сондай-ақ қызметкерлердің функционалдық міндеттеріне талдау жасалды.

 

Алматы қаласы әкімі аппаратында жеке және заңды тұлға өкілдерінің өтініштерін, ұсыныстарын, хабарламалары мен пікірлерін тіркеу, есепке алу, қабылдауды ұйымдастыру, сондай-ақ олардың қаралуын бақылау жұмыстары Алматы қаласы әкімдігінің регламентіне, Алматы қаласы әкімі аппараты жанындағы Азаматтарды қабылдау орталығының жұмыс регламентіне, «Алматы қаласы әкімі аппараты» коммуналдық мемлекеттік мекемесі туралы ережеге және Алматы қаласы әкімі аппаратының өтініштердің қаралуын бақылау бөлімі туралы ережеге (бұдан әрі – ӨҚББ ережесі) сәйкес жүзеге асырылады.

 

Регламенттеуші құжаттарға талдау

 

Ереженің 2-тармағына сәйкес, Өтініштердің қаралуын бақылау бөлімі (бұдан әрі – ӨҚББ) өз қызметінде Қазақстан Республикасының Конституциясын, заңдарын, Қазақстан Республикасы Президенті мен Үкіметінің актілерін, өзге де нормативтік құқықтық актілерді басшылыққа алады.

 

Сонымен қатар, ӨҚББ ережесінде азаматтардың өтініштерімен жұмыс жүргізу және оларды қарау тәртібі жүзеге асырылатын келесі заңдар мен өзге де нормативтік құқықтық актілердің атаулары нақты көрсетілмеген:

• «Ақпаратқа қол жеткізу туралы» Қазақстан Республикасының Заңы;
• «Адвокаттық қызмет және заң көмегі туралы» Қазақстан Республикасының Заңы;
• «Масс-медиа туралы» Қазақстан Республикасының Заңы;
• Қазақстан Республикасы Бас Прокурорының 2023 жылы 4 қаңтардағы №4 «Мемлекеттік органдарға, жергілікті өзін-өзі басқару органдарына, мемлекет жүз пайыз қатысатын заңды тұлғаларға келіп түсетін өтініштерді тіркеу, есепке алу қағидаларын, сондай-ақ «Электрондық өтініштер» ақпараттық-талдамалық жүйесін жүргізу қағидаларын бекіту туралы» бұйрығы (бұдан әрі – ҚР БП №4 бұйрығы).

 

Бұдан бөлек, ӨҚББ ережесінде Мемлекет басшысының, Президент Әкімшілігі, Үкімет және Үкімет Аппараты басшылығының тапсырмаларын орындау тәртібін регламенттейтін мынадай нормативтік актілер ескерілмеген:

• Қазақстан Республикасы Президентінің 2010 жылы 27 сәуірдегі №976 «Қазақстан Республикасы Президентінің Жолдауын дайындау және іске асыру, Президент актілері мен тапсырмаларымен жұмыс істеу және олардың орындалуын бақылау, нормативтік құқықтық жарлықтардың мониторингін жүргізу қағидаларын бекіту туралы» Жарлығы (бұдан әрі – ҚР Президентінің №976 Жарлығы);
• Қазақстан Республикасы Үкіметінің 2023 жылғы 6 қаңтардағы №10 регламенті.

 

– Қазақстан Республикасы Президенті Әкімшілігі басшысының 2022 жылы 1 маусымдағы №22-01-38.16 бұйрығымен бекітілген Қазақстан Республикасының мемлекеттік органдарында Қазақстан Республикасы Президенті Әкімшілігінің құжаттарымен жұмыс істеу және оларды Президент Әкімшілігіне жолдау қағидалары (бұдан әрі – Президент Әкімшілігі құжаттарымен жұмыс істеу қағидалары).

 

Әкімдік регламентіне және ӨҚББ ережесіне Мемлекет басшысының және Президент Әкімшілігі басшылығының мемлекеттік органдардың бақылауына берілген тапсырмаларын орындау тәртібін айқындау бөлігінде толықтырулар енгізілмеген (Президент Әкімшілігінің 2022 жылы 13 қазандағы №22-01-38.32, 2023 жылы 30 желтоқсандағы №23-01-38.56 бұйрықтары).

 

Анықтама: Президент Әкімшілігі құжаттарымен жұмыс істеу қағидаларының 23-1-тармағы.

 

Бақылауды бекіту жазбаларында, Президенттің немесе Президент Әкімшілігі басшылығының резолюцияларында одан әрі бақылауды жүзеге асыруға Үкімет, министрлік, агенттік немесе өзге де мемлекеттік орган жауапты деп көрсетілген жағдайларда есептік ақпарат Президент Әкімшілігіне ұсынбай, аталған мемлекеттік органдардың атына жолданады.

 

Бақылауға бекітілген мемлекеттік органдар тапсырмалардың толық, уақтылы және сапалы орындалуын қамтамасыз етуге жауапты.

 

Мемлекеттік органдар Президент Әкімшілігінің құрылымдық бөлімшелерінің ауызша немесе жазбаша сұрауы бойынша тапсырманың орындалу барысы туралы қажетті ақпаратты (оның ішінде жұмыс тәртібімен) ұсынуға міндетті.

 

Аталған тапсырмалар бойынша жиынтық есептік ақпарат Үкімет пен мемлекеттік органдар тарапынан жылына бір рет, есепті жылдан кейінгі жылдың 31 наурызынан кешіктірілмей, №976 Жарлыққа 8-қосымшаға сәйкес нысан бойынша және осы Қағидалардың 11-қосымшасында келтірілген үлгіге сәйкес енгізіледі.

 

ӨҚББ ережесінде заң техникасы қағидаларының бұзылуына жол берілген. Атап айтқанда, мәтінде «ӘППК» қысқартуы Әкімшілік рәсімдік-процестік кодекстің толық атауы алдын ала көрсетілмей қолданылған.

 

ҚОРЫТЫНДЫ

 

Алматы қаласы әкімі аппаратының қызметін регламенттейтін құжаттарды талдау нәтижесінде оларда жоғары тұрған нормативтік құқықтық актілерде көзделген жекелеген ережелер мен нормалардың қамтылмағаны анықталды.

 

ҰСЫНЫСТАР

1. ӨҚББ ережесіне азаматтардың өтінішін қарау тәртібін белгілейтін қолданыстағы заңнамалық және нормативтік актілердің тізбесін енгізу қажет:

− ҚР Президентінің №976 Жарлығы;

− «Адвокаттық қызмет және заң көмегі туралы» Қазақстан Республикасының Заңы;

− «Ақпаратқа қол жеткізу туралы» Қазақстан Республикасының Заңы;

− «Масс-медиа туралы» Қазақстан Республикасының Заңы;

− Қазақстан Республикасы Үкіметінің регламенті;

− Президент Әкімшілігі құжаттарымен жұмыс істеу қағидалары;

− ҚР Бас Прокурорының №4 бұйрығы.

2. ӨҚББ ережесіне түзету енгізіп, нормативтік акт алғаш аталған кезде оның толық атауын — Қазақстан Республикасының Әкімшілік рәсімдік-процестік кодексін көрсету, кейіннен «ӘППК» қысқартуын қолдану қажет.
3. ӨҚББ ережесінде Мемлекет басшысының және Президент Әкімшілігі басшылығының Алматы қаласы әкімі аппаратының бақылауына берілген тапсырмаларын орындау тәртібін жеке тармақпен белгілеу қажет.
4. Өзге де ықтимал сәйкессіздіктерді анықтау мақсатында Регламентке құқықтық сараптама жүргізіп, құжатты қолданыстағы заңнама талаптарына және әкімшілік іс жүргізу қағидаттарына сәйкестендіру қажет.

 

Өтініштерді есепке алу және бағыттау жұмысының ұйымдастырылуы туралы

 

2025 жылдың 11 айында «е-Өтініш» ақпараттық жүйесі арқылы Алматы қаласы әкімі аппаратына, оның құрылымдық және ведомстволық бағынысты ұйымдарына 450 987 өтініш тіркелді (2024 жылы – 347 696), орта есеппен күніне 1 346 өтініш.

 

Қазақстан Республикасы Бас прокуратурасының Құқықтық статистика және арнайы есепке алу комитетінің Алматы қаласы бойынша департаментінің мәліметіне сәйкес, 2025 жылдың 11 айында қарау мерзімі бұзылған 438 өтініш (8,2%) тіркелген (2024 жылы – 1 309), ал мерзімін бұза отырып қайта жолданған өтініштер саны 3 062 (7,2%) болған (2025 жылы – 3 821).

 

Өтініштерді тіркеудің, қараудың, қайта жолдаудың тиянақтылығын, сондай-ақ өтініштерді қарау шеңберінде берілген тапсырмалардың орындалуын бақылау 10 мемлекеттік қызметшіден тұратын ӨҚББ-ға жүктелген (1 – басшы, 8 – бас инспектор, 1 – бас маман).

 

Алматы қаласы әкімі аппаратының орталық аппаратына келіп түсетін өтініштерді өңдеу, тіркеу және бағыттау функциялары «Алматы қаласының Шаруашылық басқармасы» ЖШС директорының бұйрығымен іссапарға жіберілген Азаматтарды қабылдау орталығының (бұдан әрі – АҚО) 10 маманына жүктелген.

 

Әкім аппаратына келіп түсетін өтініштер АҚО мамандары тарапынан тікелей жетекшілік ететін мәселелерге сәйкес әкім орынбасарларына, Аппарат басшысына және оның орынбасарларына жолданады.

 

ӨҚББ қызметкерлерінің мәліметінше, әкім орынбасарларының атына келіп түсетін өтініштерді өңдеу және қайта жолдау тек олардың қабылдау бөлмелерінің қызметкерлері арқылы жүзеге асырылады.

 

Бұл ретте әкім орынбасарларынан өтініштер салалық басқармаларға тікелей жолданып, әкім аппаратының салалық бөлімдерін айналып өтеді. Соның салдарынан әкім аппаратында азаматтар көтеріп отырған резонансты және сындарлы мәселелерге толыққанды талдау жасау үшін өзекті ақпарат болмайды.

 

Қазіргі уақытқа дейін қала әкімі атына келіп түсетін резонансты өтініштер бойынша мерзімді шолулар мен дайджестер дайындау тәжірибесі енгізілмеген. Бұл мәселе Алматы қаласы әкімдігінің 2023 жылғы өтініштермен жұмыс нәтижелері туралы анықтамада да атап өтілген.

 

Сондай-ақ, ӨҚББ 2021 жылы жұмысын бастаған сәттен бастап бүгінгі күнге дейін «е-Өтініш» жүйесіндегі «Тапсырмалар» модулі арқылы әкім орынбасарларының бақылауына бар болғаны екі өтініш алынған. Бұл әкімдік басшылығы тарапынан да, ӨҚББ тарапынан да бақылау деңгейінің жеткіліксіз екенін көрсетеді.

 

Аталған мәселе Алматы қаласы әкімдігінің 2023 жылғы өтініштермен жұмыс нәтижелері туралы анықтамада да көтерілген.

 

ҚОРЫТЫНДЫЛАР

1. ӨҚББ-ның өтініштерді бастапқы бағыттауға тартылмауы халықтың проблемалық мәселелерін ерте кезеңде анықтау мүмкіндігін шектейді.
2. Әкімдік басшылығы тарапынан ерекше назар аударуды талап ететін азаматтардың өтініштері бойынша жүйелі бақылау жоқ.
3. Әлеуметтік маңызы бар мәселелерді қозғайтын өтініштер туралы ақпарат қала әкіміне жеткізілмейді, бұл басшылықтың жеткіліксіз хабардар болуына және уақтылы шешім қабылдаудың кешеуілдеуіне әкеледі.

 

ҰСЫНЫСТАР

1. Халықтың мәселесі туралы әкімдік басшылығын тиімді мониторингтеу және уақытылы хабардар ету мақсатында келіп түсетін барлық өтініштердің бастапқы бағытталуын ӨҚББ арқылы қамтамасыз ету қажет.
2. ӨҚББ өтініштерді сындарлылық немесе ықтимал наразылық әрекеттері тұрғысынан белсенді талдап, оларды әкімдік басшылығының бақылауына қоюды бастамашылық етуі тиіс.
3. Ерекше назар аударуды талап ететін азаматтардың өтініштері бойынша дайджестерді дайындау және ұсыну тәртібі мен мерзімділігін бекітіп, оларды қала әкіміне тұрақты түрде жолдау тәжірибесін ресми түрде енгізу қажет.

 

Мемлекет басшысының, Президент Әкімшілігі, Үкімет және Үкімет Аппараты басшылығының тапсырмаларын орындауды бақылауды ұйымдастыру

 

ӨҚББ Президент Әкімшілігі мен Үкімет Аппаратынан келіп түсетін тапсырмаларды өңдеуді қамтамасыз етеді. Қала әкімі қол қоюы үшін резолюциялар жобаларын дайындап, кейін жауапты құрылымдық бөлімшелерге жолдау үшін құжаттарды ұсынады.

 

Аппарат басшысының жетекшілік ететін орынбасарына апта сайын тапсырмалардың алдағы орындалу мерзімдері туралы ақпарат ұсынылады.

 

Құрылымдық бөлімшелерге мерзімдердің жақындағаны туралы ескертулер Құжат айналымының бірыңғай жүйесі арқылы бөлім басшысының қолымен жолданады.

 

Тапсырмалардың уақтылы орындалмау қаупі туындаған жағдайда мерзімдердің бұзылуы мүмкін екендігі туралы қала әкімі аппараты басшысының орынбасарының қолымен қызметтік жазба дайындалады.

 

2024 жылдың қорытындысы бойынша Алматы қаласы әкімі аппараты Президент Әкімшілігінің 57 және Үкімет Аппаратының 76 тапсырмасын орындады, барлығы 133 тапсырма.

 

Үкімет Аппаратынан түскен тапсырмалардың жалпы санының ішінде 8 тапсырма мерзімін бұза отырып орындалған, барлық кінәлі лауазымды тұлғалар тәртіптік жауапкершілікке тартылған.

 

Анықтама: Қазақстан Республикасы Президентінің 2015 жылғы 29 желтоқсандағы №152 «Мемлекеттік қызмет өткеру мәселелері туралы» Жарлығының 82-тармағына сәйкес, егер әкімшілік мемлекеттік қызметші жаңа тәртіптік теріс қылық жасамаса және өзін адал қызметкер ретінде көрсетсе, тәртіптік жаза алты ай толмай тұрып алынып тасталуы мүмкін.

 

Материалдарды зерделеу нәтижесінде барлық тәртіптік жазалардың 1,5 айдан 4,5 айға дейінгі мерзімде мерзімінен бұрын алынғаны анықталды.

 

Мысалы, Алматы қаласы Құрылыс басқармасының жобалық-сметалық жұмыс бөлімінің бас маманы Тұрлыби С.У. Премьер-Министрдің орынбасары С.М. Жұманғариннің тапсырмасын (ЖТ-2023-00434835-4) уақытылы орындамағаны үшін «сөгіс» түріндегі тәртіптік жауапкершілікке тартылған (27.06.2024 ж. №146 ж/қ).

 

1,5 ай өткен соң тәртіптік жаза мерзімінен бұрын алынған (15.08.2024 ж. №191 ж/қ).

 

Сол сияқты мерзімінен бұрын алынған тәртіптік жазалар:

• Алматы қаласы Қалалық мобильділік басқармасы басшысының орынбасары Байқоңыров К.К. 19.04.2024 ж. №43-ж/қ бұйрығымен – «сөгіс», 18.06.2024 ж. №66-ж/қ бұйрығымен 2 ай өткен соң мерзімінен бұрын алынған;
• Қалдықтарды басқару бөлімінің басшысы Бірімжанов Д.С. 19.02.2024 ж. №2 бұйрығымен – «ескерту», 02.05.2024 ж. №7 бұйрығымен 2,5 ай өткен соң мерзімінен бұрын алынған;
• Жер қатынастары басқармасы басшысының орынбасары Кулболдинов Н.Т. 28.03.2024 ж. №10 ж/қ бұйрығымен – «сөгіс», 17.06.2024 ж. №29 ж/қ бұйрығымен 3 ай өткен соң мерзімінен бұрын алынған;
• Тұрғын үйді есепке алу және бөлу бөлімінің басшысы м.а. Байкен Е.К. 02.04.2024 ж. №25 к бұйрығымен – «ескерту», 03.07.2024 ж. №42 к бұйрығымен 3 ай өткен соң мерзімінен бұрын алынған;
• Алматы қаласы Медеу ауданы әкімі аппаратының инженерлік және жол инфрақұрылымы бөлімінің бас инспекторы Баян А.Н. 22.01.2025 ж. №10-ө/жқ бұйрығымен – «сөгіс», 28.04.2025 ж. №65-ө/жқ бұйрығымен 3 ай өткен соң мерзімінен бұрын алынған;
• Алматы қаласы Қоғамдық денсаулық сақтау басқармасының құқықтық жұмыс және мемлекеттік сатып алу бөлімінің басшысы Мустафина М.М. 22.04.2024 ж. №66-лс бұйрығымен – «сөгіс», 23.11.2024 ж. №175-лс бұйрығымен 4 ай өткен соң мерзімінен бұрын алынған;
• Алматы қаласы Наурызбай ауданы бойынша қалалық жоспарлау және аумақтық үйлестіру бөлімінің басшысы Сайбаков Ж.А. 30.04.2024 ж. №21 бұйрығымен – «сөгіс», 16.09.2024 ж. №38 бұйрығымен 4,5 ай өткен соң мерзімінен бұрын алынған.

 

ҚОРЫТЫНДЫ

 

Үкімет Аппараты тапсырмаларын уақытылы орындамау фактілері (8 жағдай) болғанына қарамастан, барлық тәртіптік жазалар 1,5 айдан 4,5 айға дейінгі мерзім аралығында мерзімінен бұрын алынған.

 

Бұл тәртіптік шараларды қолдануда формалды тәсілдің бар екенін және жауапкершілікке тартылғаннан кейін қызметкерлердің мінез-құлқын бақылаудың жеткілікті циклі жоқ екенін көрсетеді. Тәртіптік жазаларды мерзімінен бұрын алу тәртіптік ықпал етудің мақсаттарына сай келмейді және заңнамада көзделген алдын алу әсерін төмендетеді.

 

ҰСЫНЫС

 

Қазақстан Республикасы Президентінің 2015 жылы 29 желтоқсандағы №152 «Мемлекеттік қызмет өткеру мәселелері туралы» Жарлығының 82-тармағын ескере отырып, тәртіптік жазаларды мерзімінен бұрын алу тәртібін сақтау қажет.

 

Үкімет пен Үкімет Аппараты басшылығының келіп түскен тапсырмаларын жолдауды созу

 

Әкім аппаратындағы құжат айналымының ішкі үдерісіне жүргізілген талдау бақылаудағы тапсырмалардың уақтылы орындалмау себептерінің бірі — тапсырмаларды орындаушыларға дейін жеткізу мерзімдерінің созылуы екенін көрсетті.

 

Мысалы:

 

1. Алматы қаласы әкімі аппаратына Үкімет Аппаратының Азаматтардың өтініштерімен жұмыс жөніндегі бөлімінен 04.11.2024 ж. №ЖТ-2024-04789342-1-2 тапсырма келіп түскен. Тапсырма темірбетон қабырғаны көзбен шолып тексеру бойынша көшпелі кеңес өткізуге қатысты болып, орындалу мерзімі 12.12.2024 ж. болып белгіленген.

 

Алматы қаласы Медеу ауданының әкімі Оразалин Е.Н. тарапынан бұрыштама берілмеу кезеңі шамамен бір айды құраған (05.11–02.12.2024 жж.).

 

Тапсырманың көріктендіру бөлімінің басшысы Мәкей А.М. деңгейінде бұрыштамалануы 4 жұмыс күнін алған (02.12–05.12.2024 жж.).

 

Нәтижесінде орындаушы Баян А.Н.-ге тапсырманы орындауға бар болғаны 6 жұмыс күні қалған (05.12.2024 ж. түскен). Жауап тапсырманың орындалу мерзімі күні — 12.12.2024 ж. дайындалып, Үкімет Аппаратына 13.12.2024 ж. жолданған, яғни 1 жұмыс күніне кешіктірілген.

 

Бұл жағдайда жауапкершілікке тек орындаушы Баян А.Н. тартылған, ал Алматы қаласы Медеу ауданының әкімі Оразалин Е.Н.-нің жауапкершілігі қаралмаған.

 

2. Үкімет Аппаратының Азаматтардың өтініштерімен жұмыс жөніндегі бөлімінің 05.02.2024 ж. №ЖТ-2024-03042354-1 тапсырмасының орындалу мерзімі 20.02.2024 ж. болып белгіленген. Тапсырма Алматы қаласы тұрғындарының жер учаскелерін өз бетінше иелену мәселесіне қатысты ұжымдық өтініші бойынша берілген.

 

Алматы қаласы Жер қатынастары басқармасының басшысы Нұрғабылов Н.Т. деңгейінде тапсырманы бұрыштамалау 3 жұмыс күнін алған (06.02–08.02.2024 жж.), ал жерге орналастыру бөлімінің басшысы Турсбеков Т.Т. 7 жұмыс күні бойы бұрыштама бермеген (08.02–16.02.2024 жж.).

 

Нәтижесінде жауапты орындаушы Темирходжаева М.Р.-де тапсырманы орындауға небәрі 3 жұмыс күні ғана қалған. 20.02.2024 ж. Үкімет Аппаратына енгізілген жауап тапсырманың сапасыз орындалуына байланысты кері қайтарылған.

 

Қайтарылған құжат тек 6 жұмыс күні өткен соң түзетіліп, Үкімет Аппаратына 28.02.2024 ж. қайта енгізілген, яғни мерзім 6 жұмыс күніне бұзылған.

 

ҚОРЫТЫНДЫ

 

Жоғары тұрған мемлекеттік органдардың тапсырмаларын орындау мерзімдерінің бұзылуы бағыттау кезеңдеріндегі кідірістерге байланысты туындайды. Атап айтқанда, аудан әкімдері мен бөлімше басшылары құжаттарға уақтылы бұрыштама бермейді, соның салдарынан тікелей орындаушылардың жұмыс істеу уақыты қысқарады. Бұл ретте жауапкершілік тек соңғы орындаушыларға ғана қарастырылады.

 

ҰСЫНЫС

 

Лауазымды тұлғалардың тапсырмаларды уақытылы бағыттауға сақтауына дербес жауапкершілігін белгілеу, сондай-ақ негізсіз кідірістерді болдырмау үшін тапсырмалардың өтуінің аралық кезеңдеріне ӨҚББ тарапынан бақылауды күшейту қажет.

 

Алматы қаласы әкімдігі басшылығының шығыс тапсырмалары/сұрауларын «е-Өтініш» АЖ-де орындау жұмысын ұйымдастыру

 

ӨҚББ қызметкерлері өтініш иелеріне жауап дайындау кезінде қажетті ақпаратты аумақтық бөлімшелерден тек Құжат айналымының бірыңғай жүйесі (ОДО) арқылы сұратады, «е-Өтініш» жүйесіндегі «Тапсырмалар» модулін пайдаланбайды.

 

Мысалы, азамат Джанаев М.М.-нің 31.10.2025 ж. №ЖТ-2025-03828117 өтініші бойынша тыңдалым рәсімін бұзу мәселесіне қатысты Алматы қаласы Жер қатынастары басқармасына 19.11.2025 ж. №8-9/2139-И сұрау ОДО жүйесі арқылы жолданған.

 

Тағы бір жағдайда, азамат Павленко В.Е.-нің 22.07.2025 ж. №ЖТ-2025-02456692 өтініші бойынша Алматы қаласы Алатау ауданы басшылығын жауапкершілікке тарту мәселесіне қатысты Алатау ауданының әкімі Майлыбаев Т.Ж.-ға 06.08.2025 ж. №8-13/1399-И сұрау жіберілген.

 

Сонымен қатар басқа құрылымдық бөлімшелерде аталған модульді пайдалану тұрақты сипатта емес. Жекелеген тапсырмалар «е-Өтініш» жүйесінде тіркелгенімен, олардың саны мардымсыз, бұл ӨҚББ тарапынан «е-Өтініш» жүйесіндегі «Тапсырмалар» модулінің бірыңғай тәсілмен қолданылмайтынын және іс жүзінде пайдаланылмайтынын көрсетеді.

 

27.07.2021 ж. мен 01.12.2025 ж. аралығында «е-Өтініш» жүйесінде 69 шығыс тапсырма/сұрау тіркелген.

 

Олардың ішінде 46 тапсырма «аяқталды» мәртебесімен бақылаудан алынған (27.07.2021 ж. мен 10.02.2025 ж. аралығында).

 

Құрылымдық бөлімшелер азаматтардың өтініштерін қарау аясында 8 жоба әзірлеген, алайда олар адресатқа жолданбаған және оларды аяқтау не жою бойынша шаралар қабылданбаған (10.04.2024 ж. мен 01.12.2025 ж. аралығында).

 

9 тапсырма/сұрау жауапты орындаушылар тарапынан уақтылы бақылаудан алынбаған, олардың ішінде 6-уы «мемлекеттік органда орындалды» мәртебесінде.

 

Аталған бұзушылықтар Алматы қаласы әкімі аппараты басшылығының тапсырмалары/сұрауларын орындау бойынша бақылау функцияларын жүзеге асыратын ӨҚББ тарапынан бақылаудың жоқтығын көрсетеді.

 

Сонымен қатар шығыс тапсырмалармен жұмыс істеу тәртібі ӨҚББ ережесінде мүлде регламенттелмегенін атап өткен жөн.

 

«Тапсырмалар» модулі бір өтініш шеңберіндегі барлық хат алмасуды толық әрі ашық тіркеуді қамтамасыз ету үшін арнайы әзірленгеніне қарамастан, әкімдік белгіленген талаптарды елемей, қажетті ақпаратты ОДО арқылы сұрату тәжірибесін жалғастырып келеді.

 

ҚОРЫТЫНДЫ

 

«Тапсырмалар» модулін пайдалану талаптарының орындалмауы өтініштермен жұмыс істеудің белгіленген тәртібінің бұзылуына әкеліп, әрбір өтініш бойынша хат алмасудың толық қадағалануын және ашықтығын қамтамасыз етуі тиіс жүйенің мақсатын бұрмалайды.

 

ҰСЫНЫСТАР

 

– Шығыс сұрауларды қалыптастыру кезінде «е-Өтініш» АЖ-де «Тапсырмалар» модулін міндетті түрде пайдалануды қамтамасыз ету.

– ӨҚББ ережесін тапсырмалардың орындалуын және оларды бақылаудан уақтылы алуды тұрақты бақылау функциясымен толықтыру.

– Регламентте «е-Өтініш» АЖ-нің «Тапсырмалар» модулінде қалыптастырылған әкімдіктің шығыс тапсырмалары мен сұрауларымен жұмыс істеу тәртібін, сондай-ақ жауапты орындаушының сараптамалық қорытындысы негізінде оларды белгіленген мерзімде бақылаудан алу тәртібін белгілеу.

 

⸻

 

Кейінгі бақылау нәтижелері

 

Алматы қаласы әкімі аппаратының өтініштермен жұмыс жүргізу қызметіне 2023 жылы жүргізілген тексеру нәтижесінде анықталған бұзушылықтар бүгінгі күнге дейін жойылмаған.

 

Мысалы, қызметтік құжаттарды «е-Өтініш» АЖ-де тіркеу тәжірибесі тоқтатылмаған.

 

2023 жылғы 4 қаңтардағы №4 Қағидалардың 15-тармағына сәйкес субъектілер арасындағы қызметтік құжаттар, жоғары тұрған органның тапсырмалары мен нұсқаулары, жарнамалық сипаттағы ұсыныстар және т.б. есепке алынуға жатпайды.

 

Соған қарамастан, бұзушылықтар сақталуда: 2025 жылдың 11 айында осындай 73 құжат тіркелген.

 

Мысалы, «Алматы жылу жүйесі» ЖШС-нен қағаз жеткізгіште келіп түскен қызметтік құжат Алматы қаласы әкімі аппаратының маманы Назарова З.Н. тарапынан 14.01.2025 ж. №ЗТ-2025-00113916 нөмірімен «е-Өтініш» жүйесінде тіркеліп, әкімдік басшылығына маршрутталған.

 

Сонымен қатар аталған құжат ОДО жүйесіне ауыстырылмай, өтініш ретінде қаралып, оған Энергетика және сумен жабдықтау басқармасы басшысының орынбасарының қолымен жауап берілген.

 

Осыған ұқсас жағдай «Алматы индустриялық аймағы» ЖШС-нің 20.03.2025 ж. №ЗТ-2025-00922268 қызметтік құжатын қарау барысында да тіркелген, ол да өтініш ретінде қаралған.

 

ҰСЫНЫСТАР

 

– Шығыс сұрауларды қалыптастыру кезінде «е-Өтініш» АЖ-де «Тапсырмалар» модулін міндетті түрде пайдалануды қамтамасыз ету.

– ӨҚББ ережесін тапсырмалардың орындалуын және оларды бақылаудан уақтылы алуды тұрақты бақылау функциясымен толықтыру.

– Регламентте «е-Өтініш» АЖ-нің «Тапсырмалар» модулінде қалыптастырылған әкімдіктің шығыс тапсырмалары мен сұрауларымен жұмыс істеу тәртібін, сондай-ақ жауапты орындаушының сараптамалық қорытындысы негізінде оларды белгіленген мерзімде бақылаудан алу тәртібін белгілеу.

 

Кейінгі бақылау нәтижелері

 

Алматы қаласы әкімі аппаратының өтініштермен жұмыс жүргізу қызметіне 2023 жылы жүргізілген тексеру нәтижесінде анықталған бұзушылықтар қазіргі уақытқа дейін жойылмаған.

 

1. Қызметтік құжаттарды «е-Өтініш» жүйесінде тіркеу тәжірибесі жалғасуда

 

2023 жылғы 4 қаңтардағы №4 Қағидалардың 15-тармағына сәйкес субъектілер арасындағы қызметтік құжаттар, жоғары тұрған органның тапсырмалары мен нұсқаулары, жарнамалық сипаттағы ұсыныстар және т.б. есепке алынуға жатпайды.

 

Соған қарамастан, 2025 жылдың 11 айында осындай 73 құжат тіркелген.

 

Мысалы, «Алматы жылу жүйесі» ЖШС-нен қағаз жеткізгіште келіп түскен қызметтік құжат Алматы қаласы әкімі аппаратының маманы Назарова З.Н. тарапынан 14.01.2025 ж. №ЗТ-2025-00113916 нөмірімен «е-Өтініш» жүйесінде тіркеліп, әкімдік басшылығына маршрутталған.

 

Аталған құжат ОДО жүйесіне ауыстырылмай, өтініш ретінде қаралған және оған Энергетика және сумен жабдықтау басқармасы басшысының орынбасарының қолымен жауап берілген.

 

Осыған ұқсас жағдай «Алматы индустриялық аймағы» ЖШС-нің 20.03.2025 ж. №ЗТ-2025-00922268 қызметтік құжатын қарау барысында да тіркелген, ол да өтініш ретінде қаралған.

 

2. Регламенттеуші құжаттардың қолданыстағы заңнамаға сәйкес келмеуі

 

«Әділет» ақпараттық-құқықтық жүйесінде 11.08.2016 ж. қабылданған, күші жойылған Әкімдік регламенті әлі күнге дейін орналастырылған. Онда 27.11.2000 ж. қабылданған, күші жойылған «Әкімшілік рәсімдер туралы» Заңға сілтеме бар. Бұл құжат айналымы мен корреспонденцияны өңдеу бөлігінде қолданыстағы нормаларға сәйкес келмейді және жаңылыстыруға әкеледі.

 

3. Резонансты өтініштер бойынша дайджестер дайындау тәртібінің болмауы

 

ӨҚББ қызметкерлерінің мәліметінше, резонансты, сындарлы немесе ықтимал наразылық сипатындағы өтініштер Алматы қаласының әкіміне қағаз түрінде жеткізіледі. Алайда, 2023 жылғы тексеру барысында да, қазіргі тексеру кезінде де мұны растайтын қызметтік құжаттар ұсынылмаған.

 

4. «е-Өтініш» жүйесіндегі шығыс тапсырмалар/сұраулар бойынша ішкі бақылаудың жеткіліксіздігі

 

2023 жылғы тексеру кезінде «е-Өтініш» жүйесінде 28.07.2021 ж. мен 25.09.2023 ж. аралығында тіркелген 46 шығыс тапсырма/сұрау болған, олардың тек 6-уы ғана бақылаудан алынған. Қалған 40 тапсырма бойынша бақылаудан уақтылы алу шаралары қабылданбаған.

 

ҚОРЫТЫНДЫ

 

Алматы қаласы әкімі аппаратында «е-Өтініш» жүйесінде өтініштермен жұмыс істеу, қызметтік құжаттарды тіркеу және тапсырмаларды орындау бойынша белгіленген қағидаларды сақтау деңгейі жеткіліксіз. Бұл 2023 жылы анықталған бұзушылықтардың жүйелі түрде қайталануына алып келуде.

 

ҰСЫНЫСТАР

 

– Қызметтік құжаттарды «е-Өтініш» жүйесінде тіркеуге қатаң тыйым салуды қамтамасыз етіп, №4 Қағидалардың талаптарын барлық қызметкерлерге жеткізу және бұзушылықтар үшін дербес жауапкершілік белгілеу.

– Нормативтік құжаттарды жедел өзектендіру, оның ішінде «Әділет» жүйесінен 2016 жылғы күші жойылған Әкімдік регламентін алып тастау.

– Резонансты өтініштер бойынша дайджестерді дайындау және ұсыну тәртібін бекітіп, оларды ұсынудың құжатпен расталатын тұрақты тәжірибесін қалыптастыру.

– «е-Өтініш» жүйесінде жүйелі ішкі бақылау ұйымдастырып, тапсырмаларды бақылаудан уақтылы алуды қамтамасыз ету.