Алматы қаласының әкімі Е. А. Досаевтың Жетісу ауданының тұрғындарымен кездесуіндегі баяндамасы

 

Алматы қаласының әкімі Е.А. Досаевтың

Жетісу ауданының тұрғындарымен

 кездесуде сөйлейтін сөзі

10.11.2022 ж.

 

Құрметті Жетісу ауданының тұрғындары!

 

Сіздерді өздеріңіздің аудандарыңыздағы кезекті кездесуде көргеніме қуаныштымын!

Алдыңғы кездесулеріміздің қорытындысы бойынша мен
89 тапсырма бердім. Бүгінгі таңда олардың 90%-ке жуығы
орындалды (78-і орындалды). 11 тапсырма бойынша жұмыс жүріп жатыр.

Жетісу ауданын одан әрі дамыту бойынша қабылданған шаралар мен атқарылып жатқан жұмыстар туралы айтып өтейін.

 

БІРІНШІ. Инженерлік желілерді жаңғырту

1. Осы жылдың қыркүйек айында Сіздермен кездескен кезде Құлагер шағын ауданындағы жылумен жабдықтау желілерін (1,7 км) реконструкциялау жұмыстарын тездету туралы мәселе көтерілді.

Құлагердегі жылу желілерін реконструкциялау осы қазан айының соңында аяқталды, құбырлар жер астына ауыстырылды, асфальт қалпына келтірілді, ескі жерүсті құбырлары бөлшектеп алынуда.

2. Қазыбаев көшесі, Рысқұлов даңғылы, Тәтібеков көшесі, Райымбек даңғылы бөлігіндегі ұзындығы 57,9 км сумен қамту желілерін реконструкциялау және канализация салу жұмыстары (су құбыры – 42,9 км, канализация – 15 км) аяқталып келеді. Бұл ретте қазылған барлық көшелер биылғы қараша айының соңына дейін тиісінше қалпына келтірілетін болады.
3. Аудан тұрғындарын, атап айтқанда, Палладин – Павлодарская – Сельская – Боралдай көшелері мен Кемел шағын ауданының тұрғындарын электр қуатымен үздіксіз қамтамасыз ету үшін 40 км ескірген желілерді реконструкциялау жұмыстары жүргізілуде (жұмыстар осы жылдың тамыз айында басталды).

Қазірдің өзінде 800 тірек орнатылып, 15,8 км кабель тартылды.

Палладин – Павлодарская – Сельская – Боралдай көшелеріндегі жұмыстар осы жылдың соңына дейін, Кемел шағын ауданындағы жұмыстар – 2023 жылдың сәуір айында аяқталады.

Бұл 4 000-нан астам абонентті үздіксіз электрмен қамтамасыз етуге мүмкіндік береді.

Осы жылдың соңына дейін Жетісу ауданындағы
6 көшедегі жарық жүйесін жаңарту жұмыстары жүргізілетін болады.

4. Бірінші кезектегі жартылай жарық жүргізілмеген көшелерді жарықтандыру мақсатында осы жылдың соңына дейін Жетісу ауданындағы 76 көшеге сыртқы жарықтандыру желісін жүргізу жұмыстары аяқталады.

ЕКІНШІ. Әлеуметтік инфрақұрылыммен қамтамасыз ету

Білім беру

1. Аудан мектептеріндегі оқушы орындарының тапшылығын қысқарту мақсатында 3 мектепке қосымша құрылыс салу жұмыстары жүргізілуде.

Осы қыркүйек айында №148 мектепте 300 орындық қосымша құрылыс салу басталды. Жұмыстар келесі оқу жылының басында аяқталады. Сондай-ақ, қазан айында №101 мектептің акт залын салу басталды, ол да 2023 жылдың тамыз айында аяқталады.

Биылғы қазан айында №112 мектепке 300 орындық, №103 мектепке 200 орындық қосымша құрылыс салу жобаларына сараптама қорытындысы алынды, құрылысын
2023 жылдың І-ші тоқсанында бастау жоспарланған.

2. Осы қараша айында №129 мектепте сейсмикалық күшейте отырып, күрделі жөндеу жұмыстары аяқталды.

Қазан айында № 80 мектепте күрделі жөндеу жұмыстары басталды, жұмыстар 2023 жылдың ІV-ші тоқсанында аяқталады.

3. Мектепке дейінгі ұйымдардағы орын тапшылығын қысқарту мақсатында 440 орындық 2 балабақшаның құрылыс-монтаждау және жобалау жұмыстары жүргізілуде.

«Айнабұлақ-4» шағын ауданында 160 орындық балабақшаның құрылысы басталды. Құрылысы келесі жылдың маусым айында аяқталады.

Осы жылдың маусым айында жеке меншікте болған екі қабатты әкімшілік ғимарат сатып алынды. Қазіргі уақытта                280 орындық балабақшаны күрделі жөндеу үшін жобалау-сметалық құжаттама әзірленуде. Жобалау желтоқсанда аяқталып, құрылысы 2023 жылдың I-ші тоқсанында басталады. Бұл мектепке дейінгі мекемеге Ратушный-Қазыбаев-Серіков-Рысқұлов көшелерінде тұратын балалар бара алады.

Денсаулық сақтау

1. Осы жылдың соңына дейін Кемел шағын ауданындағы 200 келушіге арналған отбасылық-дәрігерлік амбулатория құрылысын аяқтау жоспарланған. Бүгінгі таңда шатырды жабу, сыртқы инженерлік желілер бойынша жұмыстар аяқталды, ішкі әрлеу жұмыстары жүріп жатыр.
2. Осы жылдың тамыз айында Омаров көшесінде ауысымына 200 келушіні және Нүсіпбеков көшесінде
   300 келушіні қабылдайтын емханаларды орналастыру үшін
   2 ғимаратқа (2021 жылы сатып алынған) күрделі жөндеу жүргізуге жобалау-сметалық құжаттаманы әзірлеу басталды. Жобалау-сметалық құжаттаманы әзірлеу жылдың соңына дейін аяқталып, құрылыс-монтаждау жұмыстарын 2023 жылы бастау жоспарланған.

Дене шынықтыру және спорт

Жетісу ауданында балалар мен мектеп оқушыларын жаппай спортпен шұғылдануға тарту мақсатында осы жылдың наурыз және қазан айларында Кемел шағын ауданында ауысымына 94 келушіні және Айнабұлақ шағын ауданында 100 келушіні қабылдайтын 2 дене шынықтыру-сауықтыру кешені ашылды.

Сондай-ақ, осы жылдың 14-ші қарашасынан бастап Құлагер шағын ауданында ауысымына 150 келушіні қабылдайтын дене шынықтыру-сауықтыру кешені ашылады (қазіргі уақытта осы кешенде ресейлік релоканттарға арналған халыққа қызмет көрсету орталығы орналасқан).

 

ҮШІНШІ. Жол инфрақұрылымы және қауіпсіздік

1. Осы жылдың басынан бастап жалпы ауданы 28 мың кв. метр болатын 124 жол учаскесіне ағымдағы (шұңқыр) жөндеу жүргізілді, ұзындығы 26,3 км 21 көше орташа жөндеуден өтті.

Сіздердің өтініштеріңіздің негізінде Көкжиек шағын ауданында тротуарлар мен арықтармен бірге жолдарға жөндеу жүргізілді.

Қараша айының соңына дейін 2-ші Гончарная көшесінде орташа жөндеу аяқталады.

2. Жол қауіпсіздігін қамтамасыз ету мақсатында
   29 мекенжайда ұзындығы 16,3 км жаңа тротуар салынды, сондай-ақ адамдар жүретін өткелдерде 3 светофор орнатылды.
3. Тұрғындардың өтініш-тілектерін ескере отырып, Жетісу базарынан Адем сауда үйіне дейін ұзындығы 28 км құрайтын №138 жаңа маршрут ұйымдастырылды.

№46 маршрут 1 км-ге ұзартылды (Кемел шағын ауданында Есімхан көшесінен Арлан көшесіне дейін) автобустар саны 10-нан
12-ге көбейді.

Сонымен қатар 8 маршруттың (№40, 41, 70, 135, 52, 56, 69, 80) жылжымалы құрамы толық жаңартылды.

4. Тұрғындардың өтініші бойынша қыркүйек және қазан айларында Жетісу ауданында 30 жаңа остановка кешені орнатылды.
5. Қоғамдық қауіпсіздікті қамтамасыз ету үшін жыл соңына дейін адамдар көп жиналатын орындарда (білім беру объектілерінде – 263, аулаларда – 130, парктер/скверлерде – 152, жол қиылыстарында – 52) 597 бейнекамера орнатылады.

Қолданыстағы 490 камераға есептелген 86 «Сергек» аппараттық-бағдарламалық кешеніне қосымша 2023 жылдың I-ші тоқсанында 399 камераға арналған 85 «Сергек» кешені орнатылады.

Барлық жұмыс аяқталғаннан кейін Жетісу ауданында камералардың санын 996 бірлікке дейін көбейтеміз.

 

ТӨРТІНШІ. Көшелерді су басу мәселелерін шешу

Өткен кездесулерде Жетісу ауданының тұрғындары жеке секторды, атап айтқанда Рабочий кентіндегі су басу мәселесін көтерген болатын.

Аудан әкімдігінің күшімен Брюсов көшесіндегі үйлерді үнемі су басу проблемасы жойылды.

Қосымша 16 мекенжайда ұзындығы 7,1 км арық реконструкцияланды.

Сонымен қатар ауданда қатты жауын жауған кезде тұрақты су басатын 8 учаске бар. Төтенше жағдай желісі бойынша бұл проблеманы шешу үшін ұзындығы 7,2 км арық желісін салу,
2,2 км коллекторды қалпына келтіру және 2,5 км Есентай каналында тазарту жұмыстары жүргізілуде. Бұл жұмыстарды жыл соңына дейін аяқтау жоспарланған.

Келесі жылы Экология және қоршаған орта басқармасының желісі бойынша ұзындығы 27 км болатын 27 учаскеге арық желілерін салу жоспарланған.

БЕСІНШІ. Жайлы қалалық орта

2022 жыл Жетісу ауданында қоғамдық кеңістіктерді салу, реконструкциялау және жөндеу бойынша рекордтық жыл болды.

1. Есентай өзенінен Черновицкая көшесіне; Кіші Алматы өзенінен Коперник көшесіне дейін; Қарасу Омаров көшесінен Қазыбаев көшесіне дейін жаңа жағалаулар салынды. Осы шағын учаскелердің тұрғындары оларды жақсы қабылдады.

Көкмайса шағын ауданындағы Есентай өзенінің жағасындағы қараусыз қалған аумақ та жақсарды. Экология және қоршаған орта басқармасының жобасы бойынша бұл учаскеде Есентай өзенінің бойымен 16 гектар жаңа серуендеу аймағы құрылды.

2. Республика күні қарсаңында 2 жаңа жастар паркі (алаңдары) ашылды, біреуі Рысқұлов, Сүйінбай даңғылдарының қиылысындағы автомобиль көпірінің астында, екіншісі Айнабұлақ-1 шағын ауданында.

Аталған парктерде жастар арасында көше спортын насихаттау мақсатында Алматы қаласының Скейтбординг федерациясының қатысуымен және оның ұсыныстарын ескере отырып салынған, ауданы 1500 шаршы метрден асатын скейт-алаңдар орнатылды. Стритбол, баскетбол, волейбол және заманауи воркаут алаңдары да жабдықталған.

Бұл алаңдар Жетісу ауданының жастары үшін нағыз тартылыс орталықтарына айналды.

Айнабұлақ паркінде қалалық скейтбординг федерациясын ұйымдастыру кезінде скейтбордтан қалалық жарыстар өткізілгенін атап өткім келеді.

3. Сонымен қатар Көкжиек шағын ауданында жаяу жүргіншілер аймағының құрылысы аяқталды. Онда жаңа жарықтандыру тіректері, орындықтар мен workout аймақтары, орындықтар мен құрғақ фонтан орнатылды, жаяу жүргіншілер аймағы ұлғайтылды.
4. Айнабұлақ шағын ауданында Жұмабаев көшесіндегі жаяу жүргіншілер аймағының құрылысы аяқталып қалды.
5. Биыл «Халық қатысатын бюджет» жобасы шеңберінде ауданда 800 млн. теңгеге 23 жоба іске асырылды.

Бұл жобалар Великолукская көшесінде жаңа қоғамдық кеңістік құруға мүмкіндік берді.

Сондай-ақ осы кезеңде жаңа спорт алаңдары, оның ішінде Жангелдин және Ратушный көшелерінің бойындағы скверлерде 6 теннис және 6 шахмат үстелдері орнатылды.   

Аталған жоба бойынша аудан тұрғындары 2023 жылға қоғамдық кеңістікті абаттандыру және көгалдандыру, балалар мен спорт алаңдарын жөндеу және орнату үшін 129 өтінім берді, оның ішінде 18 жоба алдын ала іріктелді.

 

Құрметті Жетісу ауданының тұрғындары!

Енді Сіздердің сұрақтарыңызға жауап беруге дайынмын.

Назарларыңызға рақмет!