Алматының даму бағдарламасы мәслихат сессиясында таныстырылды

Алматының барлық ауданында жайлы қалалық орта құру және өмір сүру сапасын арттыру – жаңа бағдарламаның негізгі мақсаты. Бұл туралы мәслихат отырысында қала әкімі Ерболат Досаев айтты.

«Алматы қаласын дамытудың 2025 жылға дейінгі бағдарламасы және 2030 жылға дейінгі орта мерзімді перспективалары» құжаты 5 ай әзірленді.

Бұған 130 сарапшы, әкімдік мамандары және қоғам өкілдері атсалысты. Қала тұрғындары, депутаттар мен қоғамдық кеңес өкілдерінен келген 1280 идея мен ұсыныс ескерілді.

«Даму бағдарламасының авторлары Алматының жүздеген тұрғыны, олар біздің қаламыздың барынша жайлы, қауіпсіз, технологиялық және жасыл болуы үшін нақты іс-қимыл жоспарын ұсынды», - деп хабарлады Ерболат Досаев.

Көлемді және кешенді құжат қысқа және орта мерзімді перспективаға арналған қаланың даму жоспарын білдіреді.