Байғанин ауданының Оймауыт ауылында мектеп пен клуб салынады

 

Байғанин ауданына  жұмыс сапары барысында  облыс әкімі  Асхат Шахаров Оймауыт және Миялы  ауылдарының тұрғындарымен кездесіп, әлеуметтік нысандарды аралады. 

Оймауыт ауылы – Жаңажол ауылдық округінің  құрамына кіретін жалғыз елді мекен.  Бүгінде  онда  770-тен астам адам тұрады. Округ аумағында 3 ЖШС және 30 фермерлік  шаруашылық тіркелген. Ауылда мектеп, кітапхана, амбулатория, ескі клуб бар. Газбен  жабдықтау мәселесі де шешілуде. Келесі жылы  ауылға газ құбыры тартылады деп күтілуде.  

Өңір басшысымен кездесуде оймауыттықтар  оларға жаңа мектеп салуды, жолды жөндеу және интернет желісін жүргізіп беруді сұрады.

«Біздің ауылға жол керек. Мектебіміз қазірдің  өзінде ескі, ал клуб қирағалы тұр. Газ өткізуге   уәде берді - бұл жақсы жаңалық. Біз үлкен  сеніммен күтеміз. Интернет келсе дейміз. Егер  ауылда тұруға жағдай жасалса, балалар бұл жерден көшпейді», - дейді жергілікті тұрғын  Талдыбай Талқанбаев.

Белгілі болғандай, Оймауытта 2021 жылы 150 орындық мектеп-балабақша салына бастаған. «Абай-Б» ЖШС мердігер ұйымы іргетасын құйыпүлгерген. Бірақ бұл жерде жұмыс тоқтап тұр. Мердігер өз міндеттемелерін орындамапты. ЖСҚ түзету мәселесін облыстық бюджет комиссиясы қарайды, - деді әкім жергілікті  тұрғындарға.

Асхат Шахаров оқу орны салынып басталған құрылыс алаңын қарап, Оймауыт ауылындағы  жұмыс істеп тұрған мектепке барды.

«Біз үшін облыстың әрбір елді мекенінде жақсы өмір сүру жағдайын жасау маңызды. Байғанин ауданында газбен жабдықтау мәселесі  шешілуде. Осы мақсатқа барлығы 8 млрд теңге бөлеміз. Қазір Қаражар ауылында жеткізуші және ауылішілік газ құбыры салынуда. Содан кейінгі кезек – Оймауытта. Біз ауданда барлығы  9 елді мекенді газбен қамтамасыз етуді  жоспарлап отырмыз. Мектеп-балабақша салу, интернетпен қамтамасыз ету мәселесін де шешеміз. Қазір Миялыдан Оймауытқа дейінгі  жол салынып жатқанын білесіздер, жұмыстар  келесі жылы аяқталады. Клуб демеушілік   қаражат есебінен салынады. Демеуші - «ҚазақОйл» компаниясы. Олар қазірдің өзінде  80 орындық жаңа клуб салуға 200 млн теңге бөлді. «Қазір жобалық-сметалық құжаттама  дайындалуда. Жұмысты келер жылы бастаймыз. Шешілмейтін мәселе жоқ», - деді облыс әкімі жергілікті тұрғындарға.

Оймауыттағы нысандарды аралап болған соң, өңір басшысы «Қарауылкелді – Алтай батыр – Миялы – Оймауыт» бағытын беттейтін жол құрылысын қарап, мердігермен сөйлесті. «Мерей и К» ЖШС – жол салып жатқан компания. Төртінші санаттағы жол, екі жолақты. Жоба бойынша құрылыс компаниясы жол бойындағы су құбырын да жөндеуі керек. Құрылыс 2025 жылдың наурыз айында  аяқталады.

Әрі қарай облыс әкімі Миялы ауылына барып, жергілікті тұрғындармен кездесіп, олардың сұрақтарына жауап берді. Миялы тұрғындары  әкімнен газбен жабдықтау мәселесін шешуді  және оларды интернетпен қамтамасыз етуді  сұрады. Асхат Шахаров тұрғындарға ауылды   газбен жабдықтау және интернетпен қамтамасыз  ету мәселесі шешіліп жатқанын жеткізді.

Сонымен қатар, әкім Миялы ауылындағы Т. Айбергенов атындағы орта мектепке барды. Қазір мұнда жөндеу жұмыстары жүріп жатыр. Мектеп 320 орынға шақталған, ал онда 85 оқушы ғана оқиды. Мектепте барлығы 14 сынып   бар. Пәндік кабинеттер, спорт және акт залдары, сонымен қатар 40 орындық асхана да бар.

Байғанин ауданына жұмыс сапары аяқталғаннан   кейін облыс әкімі  Асхат Шахаров жауапты   тұлғаларға ауыл тұрғындарының барлық  проблемалық мәселелерін бақылауға алып, заң аясында шешімін беріп, ұсыныстар әзірлеуді тапсырды.