Темір ауданының тұрғындары материалдық шығынға өтемақы алып жатыр

Бүгінгі күнге дейін жергілікті атқарушы органдарға көктемгі су тасқынынан зардап шеккен Темір ауданы тұрғындары тарапынан  материалдық шығындарды өтеу үшін 91 өтініш келіп түсті. Оның 82-сі отбасыға төленетін біржолғы төлем бойынша тіркелді. 

Темір ауданында жергілікті ауқымдағы табиғи сипаттық төтенше жағдай бойынша құрылған арнайы комиссия әр өтінішті қарауда. 

Тіркелген өтініштер негізінде су тасқынынан зардап шеккен 7 отбасыға 34,3 млн теңгеге материалдық шығынды өтеу бойынша берілетін өтемақы төленді. Қалған өтініштердің қорытындысы кезең-кезеңімен, тексеру нәтижесіне сәйкес шығады.

Үйін  су басқан  Шұбарқұдық кентінің тұрғыны Николай Капустянскийдің отбасына біржолғы төлем және материалдық шығынды өтеу бойынша берілетін өтемақы аударылды.

«25-і күні бізде көктемгі су тасқыны болып, менің үйімді су басып қалды. Үйдің мүлкі бүлініп, қабырғадан су өтіп кеткен. Әйелім екеуміз  дүние-мүлкімізді сақтап қалуға тырыстық, бірақ біршама зат жарамсыз болып қалды. Бүгінде бүлінген дүние-мүлік үшін өтемақы алдық. Бұл тек Шұбарқұдықта ғана емес, Ақтөбе облысында, жалпы  республикамызда болып жатқан жағдай. Табиғи апатты біз бірге жеңіп шығамыз», - деп Николай Капустянсикий көрсетілген көмекке өз ризашылығын білдірді.