Қасиетті Қадір түнінде Ақтөбе облысының әкімі Ералы Тоғжановтың атынан «Нұр-Ғасыр» орталық мешітінде Ораза ұстаған жандарға ауызашар дастарханы жайылды

Ералы Тоғжанов Рамазан айының барша мұсылмандар үшін маңыздылығын атап өтті.

«Рамазан айы - теңдессіз нығметтер айы. Бүгін барша мұсылман қауымы үшін ерекше, мың айдан қадірлі Қадір түні. Тілеген дұға-тілектер, жасаған құлшылықтарыңыз қабыл болсын.  Еліміз аман, жұртымыз тыныш, халқымыздың бірлігі нығайып, берекесі арта берсін!», - деп атап өтті облыс әкімі.

Облыстың бас имамы Серікжан Еншібай уағыз айтып, қазақстандықтарға амандық пен өсіп-өркендеу тіледі.

Құран оқушылар байқауының жеңімпаздарына сыйлықтар берілді. Бас жүлде иегеріне кіші қажылыққа сертификат табысталды. 

Шара соңында облыс әкімі 4 аз қамтылған отбасыға баспана кілтін табыс етті. Пәтерлер Қазақстан Діни мұсылмандары басқармасының «Зекет және қайырымдылық» қорының қаражатына сатып алынды.