Ақтөбе облысында 130-дан астам жаңажылдық шаралар өтеді

Ақтөбе облысындағы мәдениет мекемелерінде Жаңа жыл қарсаңында 130-ға жуық мәдени, ойын-сауық іс-шаралар өтеді. Бұл туралы мәдениет, архивтер және құжаттама басқармасының басшысы Алтынай Юнисова жаңажылдық мерекелерді өткізуге дайындық мәселелері жөніндегі кеңес барысында мәлімдеді.

Негізгі мерекелік іс-шаралар 31 желтоқсанда өткізілмек. Ақтөбеде халықтық мерекелер 8 алаңда – Тұңғыш Президент атындағы мәдениет және демалыс саябағында, облыстық және қалалық әкімдіктер, «Жекпе-жек» сарайы, облыстық халық шығармашылығы орталығы, Есет батыр, Сазды, Құрайлы тұрғын үй алаптарында  ұйымдастырылады. Айта кетейік, саябақта мерекелік бағдарлама түнгі 2-ге дейін жалғасады.

Облыс әкімі Ералы Тоғжанов ата-анасының қамқорлығынсыз қалған жетім балаларды, көпбалалы отбасылардан шыққан және мүмкіндіктері шектеулі балаларды, сондай-ақ әлеуметтік осал топ санатындағы отбасыларды мерекелік іс-шаралармен барынша қамтуды тапсырды.

Бұдан өзге, өңір басшысы уәкілетті органдарға жаңажылдық мерекелерде азаматтар қауіпсіздігін және нысандарда тәртіп ережелерін сақтауды  тапсырды.