Ақтөбе облысының әкімі Оңдасын Оразалин Италия Елшісімен кездесті
Сәрсенбі, 2 наурыз күні Ақтөбеде облыс әкімі Оңдасын Оразалин мен Италия Республикасының Қазақстандағы Төтенше және Өкілетті Елшісі Марко Альберти жұмыс бабымен кездесті.
Кездесуде Ақтөбе облысы мен Италия өңірлері арасындағы экономикалық, әлеуметтік және мәдени салалар бойынша серіктестік сұрақтары талқыланды.
Сауда-экономикалық қарым-қатынастар мен инвестициялық ынтымақтастықтың әлеуетін ашу керектігіне ерекше назар аударылды.
Оңдасын Оразалин Ақтөбе облысы мен Италия арасындағы тауарайналым тұрақты өсіп келе жатқанын атап өтті.
“2021 жылдың қорытындысы бойынша тауарайналым 167,5 млн. АҚШ долларын құрады. Бұл 2020 жылғы көрсеткіштен екі есе көбірек”,- деді облыс әкімі.
Өңір басшысы «Бадамша-1» жел электр стансасын салу жобасының маңыздылығын атап өтті. Ірі жоба Қарғалы ауданында жүзеге асырылып, оған Италияның Ақтөбе облысындағы Eni компаниясы қатысқан болатын. Бүгін, 2 наурыз күні Eni-дің Ақтөбе облысындағы екінші жел паркі - «Бадамша-2» салтанатты түрде іске қосылады.
Өз кезегінде Марко Альберти өңір басшысына жылы қабылдағанына алғысын білдіріп, Италия тарапы түрлі бағыттағы екіжақты қарым-қатынасты кеңейтуге дайын екенін қосты.
Елші: “Бұл менің Ақтөбе облысына бірінші рет келуім және соңғысы емес екеніне сенімдімін. Сіздің өңірде итальяндық капитал құйылған компаниялар көп екен. Менің сапарымның бір мақсаты – олардың қызметімен танысу. Біз тек энергетика саласында ғана емес, ауыл шаруашылығында да екіжақты ынтымақтастықты әрі қарай дамытуға мүдделіміз”,- деп атап өтті.
Әңгіме барысында тараптар Ақтөбе облысы мен Италия Республикасы арасындағы қарым-қатынас жаңа деңгейге жететініне сенімді екендерін айтты.
Ақтөбе облысы әкімінің баспасөз қызметі