Оңдасын Оразалин облыстық басқарма басшыларының есептерін тыңдады
14 ақпан, дүйсенбі күні облыс әкімі Оңдасын Оразалин Ақтөбе облысы әкімдігінің басқарма басшыларын қабылдады. Олар басқарманың қазіргі жұмыс барысы мен 2022 жылдарға арналған алдағы жоспарлары жайында есеп берді.
Бес басқарманың, атап айтқанда кәсіпкерлік, еңбек инспекциясы, индустриалды-инновациялық даму, денсаулық сақтау, цифрлық технологиялар басқармаларының есептерін тыңдап шыққан облыс әкімі бірқатар нақты тапсырмалар берді.
«Басты міндет — экономика өсімінің төмендеп кетуіне жол бермей, мемлекет басшысының әлеуметтік-экономикалық даму және халықтың әл-ауқатын көтеру бойынша барлық тапсырмаларын жүзеге асыру»,- деді О.Оразалин.
Облыс әкімі сондай-ақ, бюджет қаражатын қатаң қадағалауды, қаржыландыру жоспарларына сай толық әрі тиімді игерілуін қамтамасыз етуді талап етті.
Бұдан бөлек, денсаулық сақтау басқармасының басшылығына коронавирус індетінің алдын алу және халыққа екпе салу жұмыстарын күшейту тапсырылды. Айта кетейік, бүгін Ақтөбе облысы COVID-19-дың таралуы жағынан «жасыл» аймаққа кірді.
Ақтөбе облысы әкімінің баспасөз қызметі