Оңдасын Оразалин Ақтөбе медициналық орталығында болды
Ақтөбе облысының әкімі Оңдасын Оразалин 9 ақпан, сәрсенбі күні Ақтөбе медициналық орталығында болып, дәрігерлермен тілдесті, науқастардың жағдайымен танысты.
Облыстық денсаулық сақтау басқармасының басшысы Рүстем Исаев коронавирус ауруының қазіргі жағдайын баяндады. Айта кетейік, бүгін облыс COVID-19-дың таралуы бойынша «сары» аймаққа өтті.
«Эпидемиологиялық жағдай бақылауда. Науқастар саны азайып келеді. Күн сайын аз адам тіркейміз. Бүгінде реанимациялық бөлімде коронавируспен ауырып жатқан 20 науқас бар. COVID-пен ауырып қалған жүкті әйелдер де азайды – облыс бойынша 12 науқас стационарлы түрде емделіп жатыр. Жағдайлары – қанағаттанарлық. Облыстағы барлық емдеу мекемелері қалыпты тәртіпте жұмыс жасауда»,- деді Р.Исаев.
Оңдасын Оразалин дәрігерлердің жұмыс жағдайыларына қызығушылық танытты. Өңір басшысымен әңгімелескен медицина қызметкерлері жұмыстарының жеңіл емес екенін, бірақ мемлекет тарапынан қолдау сезетіндерін жеткізді.
«Кейде жұмыс өте қиын болады, алайда бізді мемлекет қолдайтыны қуантады. Барлық бөлімдегі қызметкерлердің, соның ішінде кіші медицина қызметкерлерінің де еңбекақысы қаңтар айында өсті. Мәселен, мен 8 сағаттық жұмыс күні мен кезекшілікті қосқанда 380-400 мың теңге аламын. Бізде мейіргер болып негізінде интерндер, яғни медициналық университеттің 6, 7 курс студенттері жұмыс істейді. Қазір олар онлайн оқып жатыр, сондықтан тәуліктік кезекшілікке шыға алады. Айына 10 тәулік кезекшілік етеді, қалған уақытта сабақта. 180 мыңдай алады»,- дейді Ақтөбе медицина орталығының бөлім меңгерушісі Айгерім Түкібаева.
Өңір басшысы сондай-ақ, Ақтөбе медицина орталығының әрі қарайғы жоспарларымен танысып, халыққа медициналық қызмет көрсету сапасын жақсарту және көтеру бойынша нақты тапсырмалар берді.
Ақтөбе облысы әкімінің баспасөз қызметі