Tilshi.kz сайты мен «Жүректен жүрекке» еріктілер тобының «Волонтер қызметі» бірлескен жобасы басталды. Үш айлық жобаның мақсаты – волонтерлар мен БАҚ өкілдері арасында дұрыс байланыс орнату.
Жоба аясында Ақтөбе және Атырауда волонтерлар мен медиа саласы қызметкерлеріне семинар-кездесулер өткізу көзделген. Шара барысында екі тараптың бір-бірімен тиімді қарым-қатынас орнатуы, волонтерлық жұмыстың баспасөз беттерінде дұрыс жариялануы, құқықтық тұрғыдағы нюанстар, екі тарап үшін де пайдалы кеңестер, тағы басқа тақырыптар қарастырылады.
Сонымен бірге, Tilshi.kz сайтында «Волонтер» айдары ашылып, қоғам үшін қызмет етіп жүрген еріктілер туралы, жалпы волонтерлықты насихаттауға бағытталған имидждік материалдар, лайфхактар, волонтерлық саласындағы заңнамалар, алыс та жақын шет мемлекеттердегі еріктілер өмірі мен жұмысы туралы жарияланады.
Жоба аясында БАҚ өкілдері мен волонтерларға арналған нұсқаулық әзірленеді деп жоспарланып отыр.
Айта кетейік, «Волонтер қызметі» жобасы Internews Қазақстан қолдауымен жүзеге асырылады.
Дереккөз: tilshi.kz