GOV.KZ – Мемлекеттік органдардың цифрлық ресурстарының бірыңғай платформасы
Ақтөбе облысында ирригациялық инфрақұрылымды қалпына келтіру, заманауи суару жүйелерін енгізу және суармалы егіншілікті дамыту бағытындағы жұмыстар жалғасып жатыр.
Су ресурстарын ұтымды пайдалану және суармалы жерлердің тиімділігін арттыру мәселелері облыс әкімі Асхат Шахаровтың төрағалығымен өткен аппарат мәжілісінде қаралды.
Ауыл шаруашылығы басқармасының басшысы Асылхан Әбтиевтің мәліметінше, биыл облыстың басым бөлігінде вегетациялық кезең ауа райының қолайлы жағдайында өтті. Алайда Әйтеке би ауданында жауын-шашынның аз болуы және шілде-тамыз айларындағы аптап ыстық дәнді дақылдардың өнімділігіне әсер етті. Нәтижесінде гектарына 8,3 центнерден өнім жиналды.
Ауыл шаруашылығының тұрақты дамуы үшін егіс алқаптарын суармалы сумен қамтамасыз ету маңызды. Қазіргі таңда облыста ауыл шаруашылығы мақсатындағы тұрақты суармалы жерлердің жалпы көлемі 17,7 мың гектарды құрайды. Оның басым бөлігі Қарғалы және Мәртөк аудандарында, сондай-ақ Ақтөбе қаласында орналасқан.
Вегетациялық кезеңде ауыл шаруашылығы тауарын өндірушілердің суға деген қажеттілігі өңірдегі су қоймалары мен негізгі өзендердің есебінен қамтамасыз етілді. Ауыл шаруашылығы басқармасының дерегіне сәйкес, Ақтөбе, Қарғалы және Сазды су қоймаларындағы су қоры суару жұмыстарын жүргізуге жеткілікті болған.
Қарғалы су қоймасындағы су көлемі 98,9 млн текше метр, Ақтөбе су қоймасында 98,4 млн текше метр, ал Сазды су қоймасында 3,2 млн текше метрді құрады. Сонымен қатар суару үшін Елек, Қарғалы, Жем, Қобда, Ойыл, Ырғыз, Ор және Темір өзендерінің су ресурстары пайдаланылды.
Суармалы сумен қамтамасыз етумен қатар, өңірде су ресурстарын ұтымды пайдалануға және суармалы егіншіліктің тиімділігін арттыруға мүмкіндік беретін су үнемдеу технологияларын енгізу жұмыстары жүргізілуде.
Бүгінде мұндай технологиялар 12,3 мың гектар алқапта қолданылады. Оның 11,8 мың гектарына заманауи жаңбырлатып суару жүйелері енгізілсе, 0,5 мың гектарында тамшылатып суару технологиясы пайдаланылады. Сондай-ақ шаруашылықтарда автоматтандырылған «ақылды суару» жүйелері мен жаңбырлатқыш қондырғылар қолданылады.
Заманауи технологияларды енгізуді ынталандыру мақсатында мемлекет ауыл шаруашылығы тауарын өндірушілердің тиісті шығындарының 50-ден 80 пайызға дейінгі бөлігін өтейді. 2025 жылы осы мақсатқа 176 млн теңге инвестициялық субсидия бөлінсе, биыл бұл көрсеткіш 206 млн теңгені құрады.
2019 жылдан бері өңірде «Қазсушар» бағдарламасы аясында 9,3 мың гектар суармалы жерді қамтитын ирригациялық инфрақұрылымды қалпына келтіру жұмыстары жүргізіліп келеді. Бүгінде Қобда, Мәртөк, Ойыл, Хромтау және ішінара Қарғалы аудандарындағы 5 мың гектар алқапта жұмыстар аяқталған. Қарғалы ауданында және Ақтөбе қаласында тағы 4,3 мың гектар жердің ирригациялық инфрақұрылымын қалпына келтіру жалғасуда.
Сонымен қатар қалпына келтірілген суармалы жерлерді ауыл шаруашылығы айналымына енгізу мәселесі өзекті болып отыр.
Осыған байланысты облыс әкімі Асхат Шахаров жергілікті атқарушы органның теңгеріміндегі ирригациялық нысандарды түгендеп, олардың техникалық жай-күйі мен пайдалануға дайындығын бағалауды Табиғи ресурстар басқармасына тапсырды.
«Барлық суармалы жердің тиімді пайдаланылуын қамтамасыз етіп, қалпына келтірілген нысандардың бос тұруына жол бермеу қажет. Егер шаруашылықтар өздеріне берілген жерлерді пайдаланбаса, оларды қайтарып алып, ауыл шаруашылығымен айналысуға дайын кәсіпкерлерге беру мәселесін пысықтау керек. Ирригациялық инфрақұрылымды қалпына келтірумен ғана шектелмей, егіс алқаптарын ұлғайту және өнімділікті арттыру арқылы нақты нәтижеге қол жеткізуіміз қажет. Бұл жұмысты жүйелі түрде жүргізіп, су ресурстарын ұтымды пайдалануға және су үнемдеу технологияларын енгізуге ерекше назар аудару керек»,
– деп атап өтті Асхат Шахаров.
Өңір басшысы аудан әкімдеріне су ресурстарының пайдаланылуына талдау жүргізуді, каналдар мен ирригациялық жүйелердің техникалық жай-күйін бағалауды, анықталған кемшіліктерді жоюды және инфрақұрылымның келесі суару маусымына дайын болуын қамтамасыз етуді тапсырды.
Балалардың құқықтарын қорғау комитеті 2026-2030 жылдарға арналған «Қазақстан балалары» тұжырымдамасы аясында «Balazhan» мемлекеттік цифрлық платформасын енгізуде. Платформаның негізгі мақсаты – ерекше назар аударуды қажет ететін балаларды ерте анықтап, оларға қажетті көмекті уақтылы ұйымдастыру, деп хабарлайды ҚР Оқу-ағарту министрлігі.
«Balazhan» балалар мен олардың отбасылары туралы ақпарат жинауға қатысты жаңа талаптар енгізбейді. Бұған дейін педагогтер қағаз құжаттарда және әртүрлі ақпараттық жүйелерде жүргізіп келген мәліметтер енді бірыңғай цифрлық платформада жинақталады.
Бастапқы мәліметтер платформаға бір рет енгізіліп, кейін тек қажеттілігіне қарай жаңартылады. Бұл құжат айналымын азайтып, педагогтердің жұмысын жеңілдетуге және мамандар арасындағы өзара іс-қимылды жақсартуға мүмкіндік береді.
«Balazhan» – Ұлттық білім беру деректер қорының модулі болып табылады. Балалардың дербес деректерінің қорғалуы заңнама талаптарына сәйкес қамтамасыз етіледі.
Жаңа жүйе қолдауды қажет ететін балаларды үздіксіз сүйемелдеуге және оларға көрсетілетін көмектің тиімділігін арттыруға бағытталған.
Ерікті зейнетақы жарнасының ерекшелігі — зейнетақы жинағыңызды өз қалауыңызға қарай толықтыра аласыз. Жарна мөлшері мен оны аудару жиілігін әр адам өзі белгілейді. Ал жинақ бойынша төлемдерді белгіленген зейнеткерлік жасқа жетпей-ақ алуға мүмкіндік бар.
Ерікті жарнаны азаматтың өзі де, жұмыс беруші де төлей алады. Жұмыс беруші аударған мұндай жарна қызметкердің табысы болып саналмайды және жеке табыс салығы салынбайды.
Жинақтарыңыз туралы ақпаратты enpf.kz сайтындағы жеке кабинеттен және БЖЗҚ/ЕНПФ мобильді қосымшасынан тексере аласыз.
2024 жылғы 1 ақпаннан 2026 жылғы 1 қыркүйекке дейін «Ұлттық қор — балаларға» бағдарламасы шеңберінде нысаналы жинақтарды (НЖ) пайдалану бойынша жалпы сомасы шамамен 76,11 млн АҚШ долларына 365 553 алушыға төлем жасалды.
2026 жылдың басынан 2026 жылғы 1 қыркүйектегі жағдай бойынша 170 156 азамат жалпы сомасы 44,84 млн АҚШ доллары мөлшеріндегі нысаналы жинақтарын алды. Оның ішінде 119 279 қазақстандыққа тұрғын үй жағдайларын жақсартуға 31,00 млн аса АҚШ доллары, ал 50 877 қазақстандыққа білім алуға ақы төлеу үшін 13,83 млн АҚШ доллары аударылды.
Барлық қаражат өтініш берушілердің банктік шottарына есептеу үшін уәкілетті операторларға аударылды. Еске салайық, НЖ алушы барлық соманы немесе оның бір бөлігін пайдалануға құқылы. Егер қаражаттың бір бөлігі талап етілмесе, қалдық нысаналы жинақтау шотында (НЖШ) 10 жыл бойы сақталады. Одан кейін пайдаланылмаған қалдық алушының ерікті зейнетақы жарналары есепке алынатын жеке зейнетақы шотына аударылады.
Нысаналы талаптарға қатысушы кәмелетке толмаған балалар және нысаналы жинақтарды кәмелетке толған алушылар бойынша, сондай-ақ нысаналы жинақтарды тұрғын үйге және (немесе) білім алуға пайдалану жөніндегі статистикамен enpf.kz сайтында танысуға болады.
kids.enpf.kz сайтында Бағдарламаның шарттарымен танысып, қажетti нұсқаулықтар алып, өзіңізді қызықтыратын сұрақтарыңызға жауап алуға болады. БЖЗҚ YouTube-арнасында осы тақырып бойынша бейне нұсқаулықты көруге болады.
БЖЗҚ-да міндетті және (немесе) міндетті кәсіптік зейнетақы жарналары есебінен жинақтары бар, зейнет жасына жеткен азаматтар белгіленген кесте бойынша зейнетақы төлемдерін алуға құқылы. Бұл құқық мүгедектігі мерзімсіз белгіленген I және II топтағы азаматтарға да беріледі.
2026 жылы зейнет жасы ерлер үшін – 63 жас, әйелдер үшін – 61 жас.
Зейнетақы төлемдерін рәсімдеу үшін тұрғылықты жеріңіз бойынша ХҚКО-ға алдын ала жүгінуге болады. Құжаттар мен өтінішті зейнет жасына толуға 10 күн қалғанда тапсыруға мүмкіндік бар.
Сонымен қатар зейнет жасына толуына 2 ай қалғанда eGov-тағы мобильді азаматтар базасында тіркелген нөмірге 1414 нөмірінен SMS-хабарлама жіберіледі.
Егер азамат зейнет жасына жетіп, БЖЗҚ-дағы жинақтарын алу үшін өтініш бермесе, БЖЗҚ Мемлекеттік корпорациямен бірлесіп қажетті тексеру жүргізеді. Талаптар орындалған жағдайда төлем өтініш бермей-ақ, автоматты түрде тағайындалады.
2026 жылғы наурыздан бастап мұндай тәртіп ерікті зейнетақы жарналары (ЕЗЖ) есебінен қалыптасқан жинақтарға да қолданылады.
ЕЗЖ есебінен төлемдерді 50 жасқа толуына немесе мүгедектіктің белгіленуіне байланысты алу үшін БЖЗҚ-ға жүгінуге болады. Қызметтерді БЖЗҚ бөлімшелерінен, сондай-ақ ЭЦҚ арқылы жеке кабинеттен немесе мобильді қосымшадан алуға мүмкіндік бар.
Қажетті құжаттар тізімі мен оларды алдын ала тексеру мүмкіндігі БЖЗҚ сайтындағы «Электрондық сервистер» бөлімінде қолжетімді.
Ақтөбе облысында биылғы егін жинау науқаны аяқталуға жақын. Бүгінде өңірде дәнді дақылдардың 92,6 пайызы жиналып, 562 мың тонна астық бастырылды. Орташа өнімділік гектарына 14,2 центнер. Былтырғы жылдың осы кезеңінде бұл көрсеткіш 10,6 центнер болған.
Осылайша, биыл дәнді дақылдардың өнімділігі былтырғымен салыстырғанда шамамен 34 пайызға өсті.
Облыстық ауыл шаруашылығы басқармасының мәліметінше, егін жинау науқанын тиімді өткізуге шаруаларға көрсетіліп отырған мемлекеттік қолдау шаралары да ықпал етті. Ауыл шаруашылығы тауарын өндірушілерге жеңілдетілген несие беру және субсидиялау тетіктері қарастырылған. Бұл шаруашылықтардың материалдық-техникалық базасын нығайтып, техниканы жаңартуға ықпал етеді.
Биыл өңір шаруашылықтары 843 бірлік ауыл шаруашылығы техникасын сатып алды. Машина-трактор паркінің жаңаруы дала жұмыстарын уақытылы жүргізіп, егін жинау мерзімін қысқартуға мүмкіндік беріп отыр.
Сонымен қатар шаруашылықтарды жанар-жағармай материалдарымен қамтамасыз ету мәселесіне ерекше назар аударылуда. Қажетті көлемдегі жанар-жағармайдың жеткізілуі егін жинау жұмыстарын іркіліссіз жүргізуге мүмкіндік береді.
Қазіргі уақытта дәнді дақылдарды жинау жұмыстары жалғасып жатыр. Сонымен бірге майлы дақылдар, картоп және көкөністер жиналып жатыр.
Жиналған өнімді сақтау мәселесі де бақылауда. Басқарма мәліметінше, өңірдегі астық сақтау қоймаларының қолданыстағы қуаты жиналған өнімді орналастыруға жеткілікті.
Егін жинау науқанының соңғы кезеңінде басты міндеттердің бірі — өнімнің ысырап болуына жол бермей, жұмыстарды белгіленген мерзімде аяқтау.
Облыс әкімі Асхат Шахаров аудан әкімдеріне егін жинау науқанын белгіленген мерзімде аяқтауды және шаруашылықтар тарапынан туындайтын мәселелерді жедел шешуді тапсырды. Сонымен қатар келесі ауыл шаруашылығы маусымына дайындықты қазірден бастау қажет. Атап айтқанда, тұқым қорын қалыптастыру және күзгі дала жұмыстарын уақытылы жүргізу міндеті қойылды.
«Қазір жұмыстың қарқынын сақтап, соңғы кезеңде өнімнің ысырап болуына жол бермеу маңызды. Жауапты басшылар егін жинау науқанының нәтижесі тек жиналған өніммен өлшенбейтінін түсінуі керек. Келесі маусымға уақытылы дайындық та маңызды», — деді Асхат Шахаров.
Шалқар ауданының актив отырысында облыс әкімі Асхат Шахаров ауданының жаңа әкімін таныстырды. Өңір басшысының өкімімен Қайрат Серікбайұлы Ақшолақ Шалқар ауданының әкімі болып тағайындалды.
Жаңа әкімнің кандидатурасы ҚР Президенті Әкімшілігі және Шалқар аудандық мәслихаты депутаттарымен келісілді.
Активпен кездесу барысында облыс әкімі ауданның одан әрі дамуы үшін айтарлықтай әлеуеті бар екенін атап өтті. Сегіз айдың қорытындысы бойынша ауыл шаруашылығы, құрылыс, сауда және инвестиция салаларында оң динамика қалыптасқан. Өңдеу өнеркәсібі, шағын және орта бизнесті дамыту, жаңа жұмыс орындарын құру бағыттарындағы бірқатар көрсеткіш бойынша жұмысты күшейту қажет.
Ауданның жаңа басшысына өнеркәсіп пен ауыл шаруашылығы өнімдерін қайта өңдеуді дамыту, инвестиция тарту және кәсіпкерлікті қолдау міндеттері қойылды. Сондай-ақ жер ресурстарын тиімді пайдалану, асыл тұқымды мал шаруашылығын дамыту, ветеринария мамандарының жұмыс жағдайын жақсарту және жаңа жұмыс орындарын құру мәселелеріне көңіл бөлу тапсырылды.
Мемлекет басшысының тапсырмасымен бастау алған «Таза Қазақстан» республикалық бағдарламасы аясында аудан аумағын абаттандыру, көгалдандыру мәселелері де күн тәртібінде болуы тиіс. Облыс әкімі қалдықтарды сұрыптау және қайта өңдеу, елді мекендерді көгалдандыру жұмыстарын күшейтуді, Шалқар көліндегі шлюзді жөндеуді, сондай-ақ жол жобаларын уақтылы аяқтауды тапсырды. Ауылдық елді мекендердегі мобильді байланыстың сапасын жақсарту да маңызды міндеттердің бірі ретінде белгіленді.
Жастар арасында профилактикалық жұмыстарды күшейтіп, құқық бұзушылықтардың алдын алуға бағытталған кешенді шараларды жүзеге асыру және өскелең ұрпақ үшін қауіпсіз, жайлы әрі қолайлы орта қалыптастыру қажет.
«Ұлттық құрылтай отырыстарында көтерілген бастамалар мен Мемлекет басшысының тапсырмаларын аудан деңгейінде сапалы іске асыруға ерекше мән беру қажет. Басты міндет – тұрғындардың әл-ауқатын арттыру, жаңа жұмыс орындарын құру, халықты жұмыспен қамтуды қамтамасыз ету, әлеуметтік жағдайды жақсарту және ауданның тұрақты әлеуметтік-экономикалық дамуына қол жеткізу. Әрбір тұрғын күнделікті өмірінде оң өзгерістерді нақты сезінуі тиіс. Сондықтан жаңа басшылықтан барлық жоспар мен тапсырмаларды жедел әрі тиімді жүзеге асыру талап етіледі», – деді Асхат Шахаров.
Жаңа әкімге белгіленген бағыттарды қатаң бақылауға алып, тапсырмалардың орындалуын қамтамасыз ету міндеттелді.
Отырыста Шалқар ауданының бұрынғы әкімі Жанболат Жидеханов сөз сөйледі. Ол аудан тұрғындарына бірлескен жемісті жұмысы, әлеуметтік-экономикалық жобаларды жүзеге асыруға көрсеткен қолдауы үшін алғыс айтып, жаңа басшылыққа аудан игілігі жолындағы қызметіне сәттілік тіледі.
Шалқар ауданының жаңа әкімі Қайрат Ақшолақ артылған сенім үшін алғысын білдіріп, алға қойылған міндеттерді шешу және ауданның одан әрі дамуы үшін бар күш-жігерін салатынын жеткізді.
Жаңа басшыға аудандық ардагерлер кеңесінің төрағасы Елубай Төлепберген мен аудан ардагері Зинелғабдин Жөлекенов өз тілектерін білдірді.
Ақтөбе облысының әкімі Асхат Шахаров Шалқар қаласындағы әлеуметтік нысандар - 150 балаға арналған өнер мектебі мен Шалқар аудандық ауруханасының стационарына жапсарлас салынып жатқан қосымша ғимараттың құрылыс барысын бағамдады.
Шалқар қаласындағы жаңа өнер мектебі «Қазақстан темір жолы» компаниясының қолдауымен бой көтеруде. Жобаның жалпы құны 1,71 млрд теңге. Аумағы 2109 шаршы метр құрайтын нысан 150 балаға шақталған.
Құрылыс жұмыстарын «ATM Holding» ЖШС жүргізіп жатыр. Құрылыс биылғы наурыз айында басталды. Нысанды қараша айында аяқтау жоспарланған. Қазіргі уақытта құрылысшылар ғимаратты әрлеп, жарық тартылып жатыр.
Жаңа өнер мектебі балалардың шығармашылық қабілетін дамыту, музыка, өнер және басқа да шығармашылық бағыттар бойынша қосымша білім алуына мүмкіндік береді.
Шалқар аудандық ауруханасының стационарына жапсарлас салынып жатқан екі қабатты қосымша ғимаратқа қаржы мемлекетке қайтарылған активтер есебінен бөлінді.
Құрылыс жұмыстары мамыр айында басталған. Мердігер – «МСФ «Мұнайқұрылыс» ЖШС. Қазіргі таңда нысанның шатыры жабылған, енді ішкі әрлеу жұмыстары басталмақ. Ғимаратты 2027 жылдың қаңтарында аяқтау жоспарланып отыр.
Жаңа қосымша ғимарат аурухананың инфрақұрылымын кеңейтіп, аудан тұрғындарына медициналық көмек көрсету жағдайын жақсартуға сеп.
Асхат Шахаров құрылыс нысандарындағы жұмыстардың қарқыны мен сапасына назар аударды. Өңір басшысы мердігерлерге құрылыс жұмыстарын белгіленген кестеге сәйкес жүргізіп, нысандарды сапалы әрі белгіленген мерзімде пайдалануға беруді тапсырды.
«Шалқар тұрғындары үшін бұл нысандардың маңызы зор. Жаңа Өнер мектебі балалардың шығармашылықпен айналысуы және қосымша білім алуына мүмкіндік береді. Ал аудандық аурухананың стационарын кеңейту халыққа медициналық көмек көрсету жағдайларын жақсартуға бағытталған.
Құрылыс барысында сапа талаптары мен белгіленген мерзімдер қатаң сақталуы тиіс. Бюджет қаражатының тиімді әрі мақсатты жұмсалуына ерекше назар аудару қажет. Нысандар пайдалануға берілген кезде барлық талапқа сай, толық дайын болуы керек», – деді облыс әкімі.
Ақтөбе облысында ветеринариялық инфрақұрылымды дамыту және ауыл шаруашылығы жануарларына ветеринариялық қызметтің қолжетімділігін арттыру бағытында жұмыстар жүргізілуде. Бұл туралы Өңірлік коммуникациялар қызметінде өткен баспасөз конференциясында Ақтөбе облысы ветеринария басқармасының басшысы Айбек Сембай баяндады.
2026–2027 жылдары республикалық бюджеттен бөлінген 4,696 млрд теңге есебінен облыста 3 ветеринариялық станция, 107 ветеринариялық пункт және 57 типтік мал қорымын салу және сатып алу жоспарланған.
Биыл 77 ветеринариялық пункт пен 28 типтік мал қорымын сатып алу, сондай-ақ 3 модульді ветеринариялық станция салу жоспарланған. Бүгінде ветеринариялық нысандарға қажетті жер телімдері бөлініп, мердігерлер анықталған. Құрылыс жұмыстары кезең-кезеңімен жүргізілуде.
Атап айтқанда, 77 ветеринариялық пункттің барлығында іргетас құйылып, қабырғалары көтерілді. 71 нысанның төбесі жабылып, ішкі жұмыстары жүргізілуде, 37 пункттің құрылысы толық аяқталды.
Сонымен қатар, облыстағы эпизоотиялық ахуал тұрақты. 2026 жылы аса қауіпті 12 ауруға қарсы вакцинация бойынша 9,1 млн-нан астам ветеринариялық іс-шара жоспарланып, 8 айлық жоспар толық орындалды.
Жалпы, ветеринариялық инфрақұрылымды жаңарту және жануарлардың ауруларының алдын алу бойынша жұмыстар жалғасуда.
2026 жылғы 7 қыркүйектен бастап Қазақстан Республикасының Әлеуметтік кодексіне енгізілген, салымшылардың өз зейнетақы жинақтарын басқару мүмкіндіктерін кеңейтетін өзгерістер күшіне енді. Жаңа өзгерістерге сәйкес, енді салымшы (алушы) жеке зейнетақы шотындағы (ЖЗШ) міндетті зейнетақы жарналары (МЗЖ), міндетті кәсіптік зейнетақы жарналары (МКЗЖ) және ерікті зейнетақы жарналары (ЕЗЖ) есебінен қалыптастырылған зейнетақы жинақтарының 100%-на дейін инвестициялық портфельді басқарушылардың (ИПБ) сенімгерлік басқаруына бере алады.
Бұл ретте МЗЖ және ЕЗЖ есебінен жинақтары бар салымшылар, сондай-ақ олар үшін МКЗЖ және ЕЗЖ аударылған жеке тұлғалар өздерінің сенімгерлік басқаруға берілетін жинақтарының көлемін дербес айқындауға, сондай-ақ қаржылық мақсаттарына сәйкес бір немесе бірнеше ИПБ-ны және бір немесе бірнеше инвестициял ық портфельді таңдауға құқылы.
Заңнамаға сәйкес, ИПБ үш инвестициялық портфельге дейін қалыптастыра алады: консервативті, қалыпты және тәуекелді. Олар тәуекел деңгейі, күтілетін кірістілік және инвестициялау мерзімдері бойынша ерекшеленеді. Әртүрлі инвестициялық портфельдерді таңдау мүмкіндігі Қазақстан Республикасының Әлеуметтік кодексінің 37-1-бабында бекітілген. Оларды қалыптастыруға қойылатын талаптарды қаржы нарығы мен қаржы ұйымдарын реттеу, бақылау және қадағалау жөніндегі уәкілетті орган айқындайды.
Зейнетақы жинақтарын инвестициялық портфельді басқарушылардың сенімгерлік басқаруына беру тәртібі және инвестициялық мүмкіндіктер туралы толық ақпарат БЖЗҚ сайтында және invest.enpf.kz платформасында қолжетімді.