Ауданда әкімдер сайланды және тағайындалды
2021 жылғы 25 шілдеде өткен ауылдық округтер әкімдерін сайлау қорытындылары бойынша аудандық аумақтық сайлау комиссиясы учаскелік сайлау комиссияларының хаттамалары негізінде ауылдық округтердің әкімдерін тіркеді: Тасмағамбетов Айбек Нұрланұлы - Талдысай ауылдық округінің әкімі болып (сайлауға қатысқан сайлаушылар дауыстарының 84,9%), Клютов Асылбек Қуанбайұлы - Терісаққан ауылдық округінің әкімі(82,8%), Байгелдинова Роза Түлкібайқызы - Жарсай ауылдық округінің әкімі (82,4%), Әмірғалиев Қайырбек Жұмабекұлы – И.Құрманов атындағы ауылдық округінің әкімі (78,5%), Өтегенов Есенғали Байзолұлы – Сарбұлақ ауылдық округінің әкімі (73,8%) болып сайланды.
Аудан әкімі Б.Құлов және аудандық сайлау комиссиясының төрағасы А.Оразова алғаш рет әкімдердің тікелей сайлауы ұйымдастырылған ауылдық округтерге барып, тұрғындармен кездесті.
Аудандық сайлау комиссиясының төрағасы сайлаушыларды сайлау қорытындыларымен таныстырып, сайланған әкімдерге куәліктерін табыс етті.
Аудан әкімі Б.Құлов өз өкімімен ауылдық округ әкімдерін тағайындап, оларға округтің әлеуметтік-экономикалық көрсеткіштері мен ауыл тұрғындарының әл-ауқатын арттыру, тұрмыс жағдайларын жақсарту жөніндегі жұмыстарына табыс тіледі.
Ауылдық округтер әкімдері өз сайлаушыларына сенім білдіргендері үшін алғысын білдіріп, алдағы уақытта жұмысты үлкен жауапкершілікпен атқаратынына сендірді.