Ақтөбе облысы бойынша қорғаншы және қамқоршы органдарының есебінде – 832 жетім және ата-анасының қамқорлығынсыз қалған балалар тіркелген. Оның ішінде,
қорғаншылық пен қамқоршылықта -679,
патронаттық тәрбиеде -70,
интернаттық ұйымдарда -83.
Атқарылған жұмыстардың нәтижесінде 2019 жылы Қазақстан Республикасы бойынша ең ірі балалар үйлерінің бірі болып табылатын Алға облыстық балалар үйі, 2020 жылы Темір, Қобда және 2021 жылы Мәртөк, Хромтау отбасы үлгісіндегі балалар үйлері жабылды.
Қазіргі таңы облыстағы жетім және ата-анасының қамқорлығынсыз қалған балаларға арналған білім беру ұйымдарының желісіне «Мейірім» жастарды әлеуметтік бейімдеу орталығы және «Аяла» өмірлік қиын жағдайдағы балаларды қолдау орталығы кіреді.
Бұл саладағы жұмыстың негізгі бағыттарының бірі жетім және ата-анасының қамқорлығынсыз қалған балаларды тұрғын үймен қамтамасыз ету болып табылады.
Облыста жетім балаларды жан-жақты қолдау мақсатында 2016-2020 жылдарға арналған кешенді бағдарлама жүзеге асырылды. Бағдарлама барысында облыста 384 жетім бала баспаналы болды.
Сонымен қатар, «Сәби» қайырымдылық қорының қолдауымен Ақтөбе қаласында «Мейірім» жастарды әлеуметтік бейімдеу орталығы ашылды.
Орталық 16 мен 29 жас аралығындағы балалар үйінің түлектерінің өмірге сәтті бейімделуіне ықпал етеді. Бұл ғимарат жобасының дизайн мен сәулеттен бастап, жабдықтар мен абаттандыруға дейін Қазақстандағы әлеуметтік мекемелер арасында баламасы жоқ мекеме. Қазір орталықта балалар үйінің 67 түлегі тіркелген.