Өңірдің мәдениетін, кәсіби өнерін, ұлттық тарихи мәдени мұрасын дамыту мен нығайтуда облыс тұрғындарына барлығы 480, оның ішінде 472 мемлекеттік мәдениет ұйымдары қызмет көрсетуде. Олар: 236 кітапхана, 197 клубтық мекеме, 19 музей, 1 планетарий, 2 театр, филармония және тағы басқа мекемелер.
Қазақстан Республикасының стратегиялық бағдарламаларын іске асыру мақсатында 2023 жылы атаулы даталар мен мерейтойлар жоспарына сәйкес ірі мәдени шаралар Сұлтан Бейбарыстың 800 жылдығына, Әбілқайыр ханның 330 жылдығына, Сырым Датұлының 300 жылдығына, Т.Жүргеновтің 125 жылдығына, Т.Ахтановтың 100 жылдығына, Ө.Канахиннің 100 жылдығына, Н.Тапалованың 100 жылдығына арналып өткізілді.
2023 жылдың 11 айдың есебі бойынша өңірімізде барлығы – 27533 шара өткізіліп, оған 2 408 141 көрермен қамтылды.
Биыл халық жазушысы, мемлекеттік сыйлықтың иегері Т.Ахтановтың 100 жылдық мерейтойы ауқымды түрде аталып өтті. Жыл басынан бері Т.Ахтановтың 100 жылдығына орай «Боран» драмасы қойылып, «Театр - өнердің ұлы көші» республикалық халықтық театрлар фестивалі, «Тахауи Ахтанов алаңы» апталық театр форумы, Т.Ахтанов театрының тарихына арналған кітаптың тұсаукесері мен музейдің ашылуы, «Шырағы сөнбеген заңғар жазушы» гала – концерті өткізілді.
Көрнекті мемлекет және қоғам қайраткері Темірбек Жүргеновтің 125 жылдығы халықаралық деңгейде аталып өткізіліп, «Балауса» халықаралық экспериментальді театрлар фестивалі, «Т.Жүргенов және түркі әлемінің рухани бірегейлігі» атты халықаралық ғылыми-практикалық конференциясы өткізілді.
Батыр, қолбасшы Әбілқайырханның 330 жылдығы аясында отандық ғалымдардың қатысуымен халықаралық ғылыми конференция ұйымдастырылып, «Әбілқайыр хан» тұлғасын бейнелейтін қойылым сахналанды. Әйтеке би ауданында орналасқан «Хан моласы» қорымында ас беріліп, Орынбордағы Әбілқайыр ханның жары – Бопай ханымның жерленген жерінен алынған топырағы Әбілқайыр бейітіне әкелінді.
Облыста Димаштың ұстазы М.Әйтімов атындағы «Дауыс» республикалық вокалистер байқауы, «Қобыланды деген ері бар...» республикалық жыршылар байқауы, «Music Fest Open Air» ашық аспан астындағы музыка фестивалі, Ұлттық домбыра күніне орай 1000 домбырашының қатысуымен ауқымды шара ұйымдастырылса, имидждік шара «Бақытты бала» халықаралық V ашық балалар фестиваль-байқауы, Көкжар жәрмеңкесі аясында «Тары FEST» республикалық этнофестивалі, «Әдебиет. Рух. Қоғам» әдеби форумы, «Жұбановтар әуені-2023» халықаралық вокалистер фестиваль-байқауы, «Ұлтын сүйген ұлы тұлға» республикалық айтысы, Ақтөбе облысының мемлекеттік архивінің құрылғанына 100 жыл толуына орай «Тарих және архив: тың деректер мен өзекті мәселелер» атты республикалық ғылыми-тәжірибелік конференциясы, «Халықтардың Ұлы қоныс аударуы қарсаңындағы далалық тайпалар» атты халықаралық ғылыми-тәжірибелік конференциясы, Республика күніне орай салтанатты мерекелік шара ұйымдастырылды.
«Креативті индустрияларды дамытудың 2021-2025 жылдарға арналған тұжырымдамасына сәйкес облыста С.Жиенбаев атындағы облыстық жасөспірімдер кітапханасы базасында «Жастарды зияткерлік дамыту» орталығы ашылды. С.Бәйішев облыстық ғылыми әмбебап кітапханасында «Maker space» шығармашылық кеңістігі ашылды.
«Қазақстанның киелі жерлері географиясы» жобасы аясында Ақтөбе облысының мәдени мұрасын зерттеу, сақтау, жаңғырту мен насихаттаудың 2023-2025 жылдарға арналған жол картасы бекітілді.
2023 жылы жол картасына 18 жоба жоспарланып, шетелдік және отандық ғалымдардың қатысуымен дөңгелек үстел ұйымдастырылды.
2024 жылы Қаныш Сәтбаевтың 125, Құдайберген Жұбановтың 125, Әбдіжәміл Нұрпейісовтың 100, Бердібек Соқпақбаевтың 100, Рәбиға Сыздықованың 100, Сара Мыңжасарованың 100 жылдықтарына арналып, облыс көлемінде 28 мыңға жуық іс-шаралар өткізу, өңірде тарихи-мәдени мұраны сақтау, қорғау және қалпына келтіру мақсатында 2024 жылға «Қазақстанның киелі жерлері географиясы» жобасы аясында 14 жобаны іске асыру жоспарланып отыр. Мәдениет саласында қолжетiмдiлiкті іске асыру үшін құрылыс және жөндеу жұмыстары бойынша мәдениет нысандарының тізімі нақтылану үстінде.