Меню
2025 жылдың қорытындысы бойынша Алға ауданында ауыл шаруашылығы өнімінің жалпы көлемі 25,0 млрд теңгені құрады (НКИ – 102,2%). Оның ішінде өсімдік шаруашылығы – 12,9 млрд теңге (104,8%), мал шаруашылығы – 12,1 млрд теңге (99,8%).
Мал шаруашылығында 5,3 мың тонна ет, 11,7 мың тонна сүт және 3,5 млн дана жұмыртқа өндірілді. Ірі қара мал саны – 49,5 мың бас, жылқы – 23,0 мың бас, қой мен ешкі – 82,2 мың бас.
Мал шаруашылығын дамыту және асыл тұқымды мал басын көбейту мақсатында 2025 жылы мемлекеттік қолдау шаралары аясында 378,4 млн теңге субсидия төленді.
Аудандағы егіс алқабының көлемі 64,9 мың гектарды құрады. Оның ішінде дәнді дақылдар – 19,8 мың га, майлы дақылдар – 6,7 мың га, мал азықтық дақылдар – 37,7 мың га.
Егін жинау науқаны барысында 18,9 мың гектар алқаптан 20,6 мың тонна өнім жиналып, орташа өнімділік гектарына 10,9 центнерді құрады. Майлы дақылдардың жалпы өнімі 4,6 мың тоннаны құрады.
Ауданда 1187 бірлік ауыл шаруашылығы техникасы мен жабдығы тіркелген. 2025 жылы машина-трактор паркін жаңарту аясында 34 трактор, 30 бірлік мал азығын дайындайтын және 12 бірлік жер өңдейтін техника сатып алынды. Жаңа техниканы сатып алуға мемлекет тарапынан 30% субсидия беріледі.
2026 жылғы 1 қаңтардағы жағдай бойынша агроөнеркәсіптік кешеннің негізгі капиталына тартылған инвестициялар көлемі 2,0 млрд теңгені құрады. Оның ішінде ауыл шаруашылығына – 1,5 млрд теңге, тамақ өнімдерін өндіруге – 511 млн теңге инвестиция салынды.