Шығыс Қазақстан облысында Алматы қаласымен өзара ынтымақтастық туралы меморандумға қол қойылды
Шығыс Қазақстан облысының әкімі Ермек Көшербаев өңірге жұмыс сапарымен келген Алматы қаласының әкімі Ерболат Досаевпен кездесті.
Кездесу барысында өңіраралық ынтымақтастық туралы Меморандумға қол қойылды. Меморандумның негізгі мақсаты – екіжақты өзара тиімді ынтымақтастықты әрі қарай тереңдету.
2023 жылы Алматы қаласымен өзара сауда көлемі 30 млрд теңгеден асты. Айта кетсек, Шығыс Қазақстанда орасан зор ресурстар - орман, тұщы су, пайдалы қазбалар шоғырланған. Облыс еліміздегі балдың 77 % өндіріп, күнбағыс майын өндіруден көшбасшы болып табылады. Сондықтан да жоғары стандарттарға сай сапалы азық-түлік өнімдерін жыл бойы жеткізу негізгі байланыс нүктелерінің бірі болмақ.
Сондай-ақ энергетика және тұрғын үй-коммуналдық шаруашылық саласындағы ынтымақтастық, инвестиция және туризмді дамыту мүмкіндіктері талқыланды.
Сапар соңында Алматы қасласынан келген делегация «Эмиль» және «Восток Молоко» сүт зауыттарына, «Алтай» көтерме-тұтыну орталығына, сондай-ақ Сол жағалау кешенінде орналасқан этноауылға барып қайтты.