ШҚО әкімі Глубокое ауданындағы мектеп пен амбулаторияға барды

Бүгін Шығыс Қазақстан облысының әкімі Нұрымбет Сақтағанов жұмыс сапарымен Глубокое ауданына барды.

Белоусовка кентінде былтыр көктемде ашылған №2 мектепті аралап көрді. Білім ордасында 500-ден астам бала бар. Оларға 48 мұғалім сабақ береді.

- Мұнда басқа да «Келешек мектептеріндегідей» жарық сыныптар, спорт залы, акт залы, кітапхана, компьютерлік және хореография кабинеттері бар. Балалардың сапалы әрі жайлы білім алуына қажетті барлық жағдай жасалған, - деді аймақ басшысы.

Содан кейін Нұрымбет Сақтағанов Секисовка ауылындағы дәрігерлік амбулаторияға барды. Алғашқы медициналық-санитарлық көмек көрсететін амбулатория бір ауысымда 25 пациентті қабылдайды. 2024 жылы салынған медициналық мекемеде 3 қызметкер жұмыс істейді.

Облыс әкімі ауыл жұртшылығына сапалы медициналық көмек көрсету үшін өңірдің басқа да елді мекендерінде осындай амбулаториялар салудың маңыздылығына тоқталды.