Айыртау ауданында азаматтардың жекелеген санаттарына әлеуметтік көмек көрсету туралы

Айыртау ауданында азаматтардың жекелеген санаттарына әлеуметтік көмек көрсету туралы

 

Солтүстік Қазақстан облысы Айыртау аудандық мәслихатының    2023 жылғы 20 қарашадағы      № 8-9-2 шешіміне сәйкес Айыртау ауданында «Әлеуметтік көмек көрсету, оның мөлшерлерін белгілеу және мұқтаж азаматтардың жекелеген санаттарының тізбесін айқындау қағидалары» бекітілді.

Осы Қағидалар әлеуметтік көмекті көрсету тәртібін, алушылар санаттарын, төлем мөлшерлерін, сондай-ақ оны алу үшін өтініш беру шарттарын айқындайды.

Әлеуметтік қолдауға мұқтаж деп танылатын азаматтар санаттары.

Әлеуметтік көмек төмендегі негіздердің біреуі болған жағдайда көрсетіледі:

1. Табиғи апат салдарынан азаматқа (отбасына) немесе оның мүлкіне келтірілген залал;
2. Өрт салдарынан азаматқа (отбасына) немесе оның мүлкіне келтірілген залал;
3. Әлеуметтік маңызы бар аурудың болуы;
4. Орташа жан басына шаққандағы табысы жергілікті өкілді органдар белгілеген күнкөріс минимумының еселенген мөлшерінен аспауы;
5. Жетімдік, ата-анасының қамқорлығынсыз қалу;
6. Қарттық жасына байланысты өз-өзіне қызмет көрсете алмауы;
7. Бас бостандығынан айыру орындарынан босатылуы, пробация қызметінің есебінде тұруы.

Табиғи апат немесе өрт салдарынан мүлікке залал келтірілген жағдайда әлеуметтік көмек меншік иесінің тіркелген жеріне қарамастан, зардап шеккен мүліктің орналасқан жері бойынша көрсетіледі.

Әлеуметтік көмектің мөлшерлері мен көрсету шарттары:

1. Кірісті ескере отырып әлеуметтік көмек (жан басына шаққандағы орташа табысы 1 күнкөріс деңгейінен аспайтын жағдайда - 2026 жылғы 1 тоқсанда 50851 теңге):

Әлеуметтік көмек азаматтардың мынадай санаттарына 10 айлық есептік көрсеткіш (АЕК)-43250 теңге мөлшерінде бір рет көрсетіледі:

әлеуметтік маңызы бар аурулары бар адамдарға;

         қарттық жасына байланысты өз-өзіне қызмет көрсете алмайтын адамдарға.

2. Табыс ескерілмей көрсетілетін әлеуметтік көмек төмендегі азаматтар санатына көрсетіледі:

табиғи апаттан немесе өрттен зардап шеккендерге – тұрғын үйдің меншік иелерінің біріне 100 АЕК-432500 теңге  (оқиға болған күннен бастап 6 айдан кешіктірмей);

жетім балаларға және ата-анасының қамқорлығынсыз қалған балаларға – жылына бір рет 10 АЕК-43250 теңге;

туберкулезбен ауыратын (диспансерлік есепте тұрған) адамдарға – қосымша тамақтануға ай сайын 6 АЕК-25950 теңге;

қатерлі ісіктері бар адамдарға – жылына бір рет 10 АЕК-43250 теңге;

бас бостандығынан айыру орындарынан босатылған және пробация қызметінің есебінде тұрған адамдарға – жылына бір рет 10 АЕК-43250 теңге;

АИТВ жұқтырған балалары бар ата-аналарға немесе заңды өкілдеріне – күтім және қосымша тамақтану үшін ай сайын 2 күнкөріс минимумы- 101702 теңге.

3. Қосымша әлеуметтік қолдау шаралары төмендегі азаматтар санатына:

Ұлы Отан соғысының ардагерлеріне;

басқа мемлекеттер аумағындағы ұрыс қимылдарының ардагерлеріне;

Ұлы Отан соғысы ардагерлеріне теңестірілген ардагерлерге;

Ұлы Отан соғысы жылдарында тылдағы жанқиярлық еңбегі мен мінсіз әскери қызметі үшін бұрынғы КСРО ордендері мен медальдарымен марапатталған адамдарға мынадай қолдау шаралары көрсетіледі:

тіс протездеу қызметтеріне ақы төлеу (қымбат металдардан және металл-керамикадан жасалған протездерді қоспағанда) – шот-фактура мен орындалған жұмыстар актісі ұсынылған жағдайда;

санаторий-курорттық емдеу – жылына бір рет (растаушы құжаттар ұсынылған жағдайда);

коммуналдық қызметтер мен отын шығындарын өтеу – ай сайын    2 АЕК- 8650 теңге ;

госпитализация орнына барып-қайту жол шығындарын өтеу – жылына бір рет, Қазақстан Республикасы аумағында (теміржол көлігі – плацкарт, жолаушылар автокөлігі, таксиден басқа).

I топтағы мүгедектігі бар адамдарға:

санаторий-курорттық емдеу кезінде ілесіп жүретін адамға арналған шығындар кепілдендірілген соманың 70 % мөлшерінде (тұру және тамақтану үшін, емдеу рәсімдерін есепке алмағанда) растайтын құжаттар ұсынылған жағдайда өтеледі.

Өтініш беру тәртібі

Өтінішті қабылдау және мемлекеттік қызмет көрсету нәтижесін беру келесі ұйымдар арқылы жүзеге асырылады:

1. «Айыртау ауданы әкімдігінің жұмыспен қамту және әлеуметтік бағдарламалар бөлімі» КММ;
2. кент, ауыл, ауылдық округ әкімдері;
3. «Азаматтарға арналған үкімет» мемлекеттік корпорациясы» КЕАҚ;
4. «Электрондық үкімет» веб-порталы.

Өтінішке келесі құжаттар қоса тіркеледі:

1. жеке басын куәландыратын құжат немесе цифрлық құжаттар сервисінен алынған электрондық құжат;
2. өтініш берушінің және отбасы мүшелерінің табысы туралы мәліметтер (табыс ескерілмейтін жағдайларда ұсынылмайды);
3. мұқтаж азаматтар санатына жатқызу негіздерін растайтын құжаттар (жағдайға байланысты).

Өтінішті қарау мерзімі – құжаттардың толық пакеті тіркелген күннен бастап 8 жұмыс күні.

Әлеуметтік көмектің мөлшері әрбір нақты жағдайда Айыртау ауданының арнайы комиссиясымен айқындалады.

Мемлекеттік қызмет көрсету тәртібі мен қажетті құжаттар тізбесі туралы толық ақпарат уәкілетті органның интернет-ресурсында және ақпараттық стендтерде орналастырылған.

Кеңес алу үшін байланыс телефоны: 8 (71533) 2-12-98.

 

«Айыртау ауданы әкімдігінің жұмыспен қамту және әлеуметтік

бағдарламалар бөлімі»  КММ басшысы                                   Е.Қазбеков