Мемлекеттік инспекция комитетінің және оның аумақтық бөлімшелерінің өкілдері Түркістан облысындағы ФАО-ның пестицидтерді қауіпсіз пайдалану және оның баламалары бойынша тренингке қатысты

1-2 шілдеде Сарыағаш қаласында (Түркістан облысы) ФАО, Қазақстан Республикасы Экология және табиғи ресурстар министрлігі және ГЭФ-тің «Орталық Азия мен Түркия елдерінде пестицидтердің өмірлік циклін басқару және құрамында тұрақты органикалық ластағыш (ТОЛ) бар пестицидтерді жою» жобасы аясында   ұйымдастырылған пестицидтерді қолдану және оларды қолдану кезінде туындайтын тәуекелдерді азайту бойынша тренинг өтті.

Тренингке  Ж.Жиембаев атындағы Қазақ өсімдіктерді қорғау және өсімдіктер карантині ғылыми-зерттеу институтының ғылыми қызметкерлері, Түркістан облысының ауыл шаруашылығы тауарын өндірушілері, Мемлекеттік инспекция комитетінің және оның аумақтық бөлімшелерінің өкілдері,  сонымен қатар жергілікті атқарушы мемлекеттік органдардың өкілдері қатысты.

            Тренингтің мақсаты денсаулық пен қоршаған ортаға байланысты тәуекелдерді азайту мақсатында пестицидтерді қолдану саласындағы түсінік пен құзыреттілік деңгейін арттыру болып табылады. Бұған пестицидтерді қолданудың дұрыс әдістерін, жеке қорғаныс құралдарын (ЖҚҚ) қолдануды, қауіпсіз бүрку әдістерін, сондай-ақ үш рет шаю процедураларын қолдана отырып, пестицидтерден кейін ыдыстарды дұрыс пайдалану мен жоюды үйрету кіреді. Сонымен қатар, тренинг қоршаған ортаға және адам денсаулығына теріс әсерді азайту кезінде пестицидтерге тәуелділікті азайтудың тұрақты шешімі ретінде зиянкестермен интегративті (біріктірілген) күресті қоса алғанда, балама тәсілдерді зерттеуге бағытталған.