Қаржы мониторингі комитеті ұжымының Балалар үйіне қайырымдылық сапары.

Қаржы мониторингі комитетінің қызметкерлері Халықаралық балаларды қорғау күнін мерекелеу қарсаңында қайырымдылық сапарымен Мамандандырылған балалар үйінде болып қайтты. 

Мамандандырылған балалар үйі – жетім, ата-анасының қамқорлығынсыз қалған балаларға, сонымен бірге орталық жүйке жүйесіне органикалық зақым келген, ақыл-ойы мен дене дамуында ақаулықтары бар балаларға медициналық көмек пен тәрбие берумен айналысатын мемлекеттік мекеме.

Балалар үйінде туғанынан 4 жасқа дейінгі балалар орналасқан.

Мереке қарсаңында, Балалар үйінің жаңадан ашылған кіші амфитеатрында, мекеме ұжымы мен бүлдіршіндер өздері дайындаған концерттік қойылым болды. 

«Тұсау кесу» ұлттық салт-дәстүрі мерекенің ең әсерлі сәті болды.

Комитеттің қызметкерлері ұжымның атынан балалар үйінің тәрбиешілер құрамын олардың адал көңілдері мен қамқорлығы үшін алғыс білдіріп, Балалар үйінің жаңа физикалық-емдеу кабинетіне мінуге арналған әткеншекті сыйға тартты.

Осыған ұқсас қайырымдылық шараларын барлық аумақтық Экономикалық тергеу департаментері де өткізіп, балалар үйінің тәрбиеленушілері мен аз қамтылған отбасылардың балаларына басты назар аударылды.