Алматыда Комплаенс кеңесі аясында қылмыстық кірістерді жылыстатумен күрес мәселелері талқыланды

2020 жылғы 19 қазанда Алматы қ. ҚР ҚМ Қаржы мониторингі комитетінің бастамасы арқасында екінші деңгейлі банктер мен Қазақстан қаржыгерлері қауымдастығы өкілдерінің қатысуымен қылмыстық кірістерді жылыстату мен терроризмді қаржыландыруға қарсы іс-қимыл саласындағы Комплаенс кеңесінің отырысы өтті.

Іс-шара барысында өкілетті орган мен қаржы институттары арасындағы тиімді өзара әрекеттесу мәселелері талқыланды, қылмыстық кірістерді заңдастыру мен терроризмді қаржыландырумен күресте күш-жігерді біріктіру бойынша келісімдерге қол жеткізілді.  

Сонымен қоса, бірлескен жұмыстың нәтижелері ұсынылды. Осылайша,  соңғы бес жылда бірінші рет ақша қаражатын қолма-қол ақшаға айналдыру деңгейін 39%-ға азайту мүмкін болды.

Қаржы мониторингі арқылы жалған шот-фактуралар жазып берумен және қылмыстық қолма-қол ақшаға айналдырумен айналысатын және айналымы 2 трлн теңгеден асатын 60 әлеуетті қылмыстық топ анықталды.

Ортақ әрекеттердің арқасында бюджеттік және квазимемлекеттік қаражатты жымқыру белгілері бар 200-ден астам сұлбамен жұмыс жасалды. Сондай-ақ, сенімсіз жеткізушілер бюджеттен 364,3 млрд теңгені аударғаны белгілі болды.

Кездесудің қорытындысы бойынша заңсыз қолма-қол ақшаға айналдыру және қаражатты сыртқа шығару фактілерінің жолын кесуде тиімді өзара әрекеттесуді қамтамасыз ету жөнінде нақты ұсынымдар әзірленді.