Батыс Қазақстан облысы бойынша Экономикалық тергеп-тексеру департаменті Кәсіпкерлер палатасы мен Әділет департаментінің бірлесіп ұйымдастырылған құқықтық семинарына қатысты. Өткізілген іс-шара кәсіпкерлердің құқықтық сауаттылығын арттыру және мемлекеттік органдармен өзара әрекеттесудің негізгі аспектілерін түсіндіруге бағытталған.
Семинар барысында қатысушылар бизнес өкілдері мемлекеттік органдарға жүгінген кездегі жиі кездесетін өзекті мәселелерді талқылады. Атап айтқанда, заңды тұлғаларды, қауымдастықтарды және қоғамдық бірлестіктерді тіркеу мен қайта тіркеу, авторлық және сабақтас құқықтарды, тауар белгілерін, патенттерді және қызмет көрсету белгілерін қорғау мәселелеріне ерекше назар аударылды.
Департамент қызметкерлері кәсіпкерлік қызмет барысында заңнаманы сақтаудың маңыздылығын атап өтіп, қатысушыларды күмәнді қаржылық схемаларға, соның ішінде жалған тұлғаларды пайдалануға және көлеңкелі экономиканың басқа да көріністеріне тартылмауға шақырды. Кәсіпкерлерге құқықтық қауіпсіздік пен экономикалық құқықбұзушылықтардан туындайтын тәуекелдердің алдын алу бойынша ұсыныстар берілді.
Мұндай кездесулер бизнес пен мемлекеттік құрылымдар арасындағы өзара сенімді нығайтып, өңір кәсіпкерлерінің арасында құқықтық мәдениетті қалыптастыруға ықпал етеді.