Қазақстан Республикасы Парламенті Сенатында «Адвокаттық қызмет және заң көмегі туралы» заң жобасы қабылданды

Бүгін Қазақстан Республикасы Парламенті Сенатының екі оқылымында Парламент Мәжілісі мақұлдаған «Адвокаттық қызмет және заң көмегі туралы» және «Қазақстан Республикасының кейбір заң актілеріне адвокаттық қызмет және заң көмегі мәсеелері бойынша өзгерістер мен толықтырулар енгізу туралы» заң жобалары қабылданды.

Заң жобалары азаматтардың конституциялық құқықтарына кепілдік беруді нығайту, құқық үстемдігін қамтамасыз етуге бағытталғандығын атап өтті.

Заң жобасында заң көмегін көрсету әркімнің сапалы заң көмегін алуға конституциялық құқығын жүзеге асыруды қамтамасыз ететін бірыңғай шаралар жүйесі ретінде қарастырылады.

Стандарттар мен сапа өлшемдері, кәсіби қағидалар және ережелер белгіленеді.

Сапасыз заң көмегі көрсетілген жағдайда осындай көмекті көрсететін тұлғаларды жауапкершілікке тарту механизмі жетілдірілді.

Халықтың әлеуметтік осал топтары үшін кешенді әлеуметтік заң көмегін көрсету институты енгізіледі.

Сонымен қатар, халықты ақпараттандыру мақсатында заң көмегінің орташа құнын анықтау қарастырылады.

2020 жылдан бастап сапасыз заң көмегі көрсетілген жағдайда азаматтардың шығыстарын сақтандыру арқылы өтеу жоспарлануда.

Сотта өкілдік ету түрінде заң көмегін көрсететін жеке тәжірибемен айналысатын заңгерлердің қызметі реттеледі.

Заң жобасы заң көмегінің айқындылығын, әділдігін қамтамасыз ететін және сапасын арттыратын бірқатар басқа да ұсыныстарды қамтиды.