«Қазақстан Республикасының кейбір заңнамалық актілеріне жер қатынастары саласындағы мемлекеттік қызметтерді цифрландыру мәселелері бойынша өзгерістер мен толықтырулар енгізу туралы» Заңның күшіне енуіне байланысты ағымдағы жылдың 1 шілдесінен бастап техникалық тексеру қызметтері бойынша сәйкестендіру құжаты - жылжымайтын мүлік объектісінің кадастрлық паспорты дайындалатын болады.
Ол мемлекеттік актілерді жер учаскелеріне және пәтерлер мен үйге арналған техникалық паспорттарға ауыстырады. Бұл ретте барлық қолданыстағы жерге мемлекеттік актілер және бұрын берілген пәтерлерге/үйлерге арналған техпаспорттар өз күшін сақтайды. Кадастрлық паспорттар негізінен жаңа объектілерге, екінші объектілерге – меншік иесінің қалауы бойынша немесе пәтерді, үйлерді және басқа да жылжымайтын мүлікті қайта құру, қайта жабдықтау кезінде рәсімделеді.
Жер учаскесіне кадастрлық паспорт: нысаналы мақсаты өзгерген, учаскенің сәйкестендіру сипаттамалары өзгерген жағдайда, бұрын берілген актіні біріктіру немесе ауыстыру кезінде дайындалады.
Жылжымайтын мүлік объектісінің кадастрлық паспорты-бұл жылжымайтын мүліктің бастапқы немесе қайталама объектісінің техникалық, сәйкестендіру сипаттамаларын, сондай-ақ қалаларда орналасқан жер учаскелерінің сәйкестендіру сипаттамаларын қамтитын сәйкестендіру құжаты, ол жер учаскесінің барлық негізгі сипаттамаларын анықтайды.
Жылжымайтын мүлік объектісінің кадастрлық паспортын дайындау және беру тәртібі «Жылжымайтын мүлікке құқықтарды мемлекеттік тіркеу туралы» Заңымен және «Жылжымайтын мүліктің бірыңғай мемлекеттік кадастрының ақпараттық жүйесіне ғимараттардың сәйкестендіру және техникалық мәліметтерін енгізу, жаңадан құрылған жылжымайтын мүлікке құрылыстар мен олардың құрамдас бөліктері, жылжымайтын мүлік объектісінің кадастрлық паспортын және жаңадан құрылған жылжымайтын мүлік объектісіне жүргізілген техникалық тексеру қорытындысы бойынша сәйкестендіру және техникалық мәліметтердің алшақтықтарын белгілеу туралы қорытынды беру» мемлекеттік қызмет көрсету қағидаларында белгіленген.
Осы қызметті алу үшін жылжымайтын мүлік объектісінің орналасқан жері бойынша «Азаматтарға арналған үкімет» мемлекеттік корпорациясы арқылы не электрондық үкімет порталы арқылы өтініш беру қажет www.egov.kz.