Мемлекеттік қызмет имиджі – бұл азаматтардың мемлекеттік органдар мен олардың қызметкерлерінің жұмысына деген көзқарасы. Билікке деген сенім деңгейі оған тікелей тәуелді. Егер адамдар мемлекеттік қызметтің адал және тиімді жұмыс істейтінін көрсе, олардың сенімі артады. Мемлекеттік қызметтің оң имиджін қалыптастыру – қоғамның тұрақтылығы мен дамуы үшін маңызды міндеттердің бірі.
Жақсы имидж үшін ең алдымен ашықтық пен қолжетімділік маңызды. Азаматтар мемлекеттік органдардың қалай жұмыс істейтінін біліп және олардың мәселелері шешіліп жатқанын көргісі келеді. «Электрондық үкімет» сияқты заманауи технологиялар мемлекет пен халық арасындағы байланысты жеңілдетеді. Цифрлық платформалар арқылы кезекке уақыт жоғалтпай-ақ қажетті қызметті тез алуға болады. Бұл мемлекеттік қызметтің баршаға ыңғайлы және түсінікті болуға ұмтылатынын көрсетеді.
Тағы бір маңызды мәселе – мемлекеттік қызметшілердің адалдығы мен кәсібилігі. Адамдар өз ісін білетін және адал атқаратын мамандарға көбірек сенеді. Қазақстанда мемлекеттік қызметшілердің біліктілігін арттыруға арналған бағдарламалар жұмыс істейді, бұл олардың өз саласында кәсіби болуына көмектеседі. Бірақ кәсібилік нақты істермен дәлелденуі тиіс: сапалы жұмыс, азаматтардың сұраныстарына назар аудару және мәселелерді жылдам шешу.
Мемлекеттік қызметте сыбайлас жемқорлықпен күреске ерекше назар аударылады. Бұл мемлекеттік қызметке деген сенімді бұзатын негізгі проблема. Сыбайлас жемқорлықтың алдын алу үшін мемлекет қатаң тексерулер жүргізіп, бақылауды күшейтіп, мемлекеттік органдарды барынша ашық етуге тырысады. Адамдар мемлекеттің бұл мәселеге жауапты қарайтынын көріп, олардың жүйенің адалдығына деген сенімдері арта түсуде.
Мемлекеттік қызмет пен қоғам арасындағы диалог та өте маңызды. Адамдар өз пікірлерінің ескеріліп жатқанын сезінуі қажет. Егер мемлекеттік қызметшілер азаматтарды тыңдауға, олардың сұрақтарына жауап беруге және мәселелерін шешуге дайын болса, бұл сенім атмосферасын қалыптастырады. Әлеуметтік желілер мен жедел байланыс желілері мемлекеттік органдармен байланысуды ыңғайлы және жылдам етеді.
Мемлекеттік қызметтің қазіргі имиджі оның өзгеруге және жаңа технологияларды енгізуге қабілеттілігіне де байланысты. Бүгінде азаматтар мемлекеттік органдардың жаңа, жылдам, ыңғайлы және тиімді жұмыс істегенін көргісі келеді. Инновацияларды қолдану мемлекеттік қызметтің заман ағымына ілесіп, алға жылжып жатқанын көрсетеді.
Мемлекеттік қызмет имиджі – бұл жай ғана әдемі көрініс емес, адамдардың сенімін нығайтатын нақты әрекеттер. Ашықтық, адалдық, кәсібилік және азаматтардың қажеттіліктеріне бағдарлану – міне, осылар мемлекеттік қызметті мықты әрі құрметті етеді. Мемлекеттік қызметті дамыту азаматтардың мемлекетке қолдау мен сенімді серіктес ретінде қарауына бағытталған. Сенімді нығайту – қоғам игілігі үшін жұмыс істейтін әрбір адамның күш-жігерімен қол жеткізілетін ортақ жетістік.
Исмагулова Г.Ж.
Әкімшілік бөлімінің бас маманы