Құқық иеленушіні сәйкестендіретін деректерді (жеке тұлғаның тегі, аты, әкесінің аты және туған күні, заңды тұлғаның атауы және тіркеу нөмірі) қоспағанда, азаматтар (дербес деректер) және басқа да құқық иелері туралы ақпаратты ашатын мәліметтер берілмейді.
Дербес деректерге қол жеткізу Қазақстан Республикасының заңнамасымен шектелген, егер сұратылған ақпарат қол жетімділігі шектеулі ақпаратқа қатысты болса, ақпаратқа қол жеткізуден бас тартылады.
Осылайша, жеке немесе заңды тұлғаның меншігінде бар жылжымайтын мүлік объектілеріне құқықтары туралы жинақталған деректер адвокаттардың, құқық қорғау, сот органдарының, сот орындаушыларының қылмыстық, азаматтық, әкімшілік іс жүргізуі, салық және басқа да мемлекеттік органдардың, Қазақстан Республикасының заңнамасында белгіленген құзыретіне сәйкес нотариустардың, мұрагерлердің, банкроттық рәсімдеріндегі конкурстық және оңалтушы басқарушылардың, сырттай байқау әкімшілерінің, мәжбүрлеп таратылатын заңды тұлғаның тарату комиссиясының (таратушы), қорғаншы және қамқоршы органдардың дәлелді сұраулары бойынша беріледі.
Ақпаратты электрондық түрде беру Халыққа қызмет көрсету орталықтарында немесе арыз берушіде электрондық сандық қолтаңба болған жағдайда, «Электрондық үкімет» интернет-ресурсы арқылы беріледі. Электрондық ақпараттық қызметтер нысандарындағы деректер қызметті ұсыну сәтіне жарамды болып табылады.
Ақтөбе облысы Әділет департаментінің баспасөз қызметі