Коммерциялық емес ұйымның құрылтайшыларының (қатысушыларының, мүшелерінің) құрамын өзгерту, сондай-ақ заңды тұлғаның, филиалдың немесе өкілдіктің басшысын ауыстыру eGov.kz порталы арқылы хабарлама беру тәртібімен жүзеге асырылады.
Коммерциялық емес ұйымның құрылтайшыларының (қатысушыларының, мүшелерінің) құрамы өзгерген жағдайда, eGov.kz порталындағы тиісті қызмет арқылы электрондық хабарлама беру қажет. Ол үшін қажетті мәліметтер толтырылып, талап етілетін құжаттар қоса тіркеледі және хабарлама заңды тұлғаның электрондық цифрлық қолтаңбасымен (ЭЦҚ) куәландырылады.
Басшы ауыстыру үшін хабарламаны жаңа басшы eGov.kz порталы арқылы өзінің ЭЦҚ-сын пайдалана отырып береді. Құрылтайшылардың санына байланысты өтініш құрылтайшымен немесе жалпы жиналыстың төрағасы мен хатшысымен келісілуі тиіс. Келісу рәсімі аяқталғаннан кейін жаңа басшы туралы мәліметтер автоматты түрде жаңартылады.
Жазбаша хабарламамен әділет органдарына немесе «Азаматтарға арналған үкімет» мемлекеттік корпорациясына жүгіну талап етілмейді. Қызмет тегін көрсетіледі, хабарламаны қарау мерзімі — 1 жұмыс күні.
Ақмола облысының Әділет департаменті
Коммерциялық емес ұйымдарды
тіркеу және тіркеу қызметі
саласындағы бақылау бөлімінің басшысы Т.Е. Әубакір