2023 жылы ArtSport бағдарламасымен 5000 нан астам бала қамтылады

Ағымдағы жылы Абай облысында «ArtSport» бағдарламасын іске асыруға бюджеттен 1,2 млрд теңге бөлінді. Бұл 5 283 баланы тегін спортпен қамтуға мүмкіндік береді. Қазіргі уақытта бағдарлама аясында спорттың 16 түрі бойынша 46 үйірме жұмыс істейді. Айта кетейік, 2022 жылы ArtSport 3 625 баланы қамтыды.

Абай облысы әкімінің орынбасары Шалқар Байбековтің айтуынша, облыста түрлі спорт мекемелері ашылды, соның ішінде бірінші кезекте мүгедектігі бар азаматтар қамтылады.

«Ауыл - ел бесігі» бағдарламасы аясында Қайнар және Ақсуат ауылдарында дене шынықтыру-сауықтыру кешендері салынды. Көкпекті және Бородулиха ауылдарында құрылыс жұмыстары жүргізілуде. Бұдан басқа, 2023-2025 жылдары «Ауыл - ел бесігі» бағдарламасы аясында облыста 2 жобаны іске асыру басталады, оның ішінде Абай ауданы Көкбай ауылында, Үржар ауданы Таскескен ауылында спорт модульдерінің құрылысы басталады», - деп атап өтті Шалқар Байбеков.

Айта кетейік, Абай облысында спорт пен салауатты өмір салтын насихаттауға жіті көңіл бөлінеді. Өткен жылы облыстың аудандары мен қалаларында 122 763 адамның қатысуымен 1 075 спорттық іс-шара өткізілді, оның ішінде халықаралық және республикалық чемпионаттар да бар.