Абай облысының барлық аудандары адвокаттық және нотариаттық қызметпен қамтылған

Ведомство басшысы Ернар Сейдімбектің айтуынша, облыстың барлық аудандары адвокаттық қызметпен қамтылған. Бүгінде облыс бойынша барлығы 116 адвокат бар.
Абай облысының өңірлік коммуникациялар қызметінде өткен баспасөз мәслихатында Ернар Сейдімбек сондай – ақ адвокаттар өз өкілеттіктерін кеңейткенін хабарлады.

2022 жылғы маусымнан бастап мемлекет кепілдік берген заң көмегін алуға құқығы бар тұлғалар тобы кеңейтілді. Енді адвокаттар жыныстық зорлық-зомбылық, адам саудасы, азаптау, терроризм актісі құрбандарына, жан басына шаққандағы орташа табысы кедейлік шегінен төмен көп балалы және аз қамтылған отбасыларға, сондай-ақ Ұлы Отан соғысына қатысушыларға, оларға теңестірілген адамдарға, басқа мемлекеттер аумағындағы әскери іс-қимылдарына қатысқан ардагерлерге, мерзімді қызметтегі әскери қызметшілерге, I және II топтағы мүгедектерге көмектесе алады,- деді Ернар Сейдімбек.

Сонымен қатар облыстың барлық аудандары нотариаттық қызметпен де қамтылған. Облыста 119 нотариус жұмыс істейді.

- 2022 жылғы қаңтарда "Нотариат туралы" Заңға түзетулер енгізіліп, нотариаттық іс-қимылдардың экстерриториалдылығы, атқарушылық жазба жасау кезінде нотариус қызметінің аумағын сақтау қажеттілігіне қатысты өзгерістер енгізілді. Бұл түзетулер нотариаттық іс - әрекеттерге қатысушылардың құқықтарының сақталуын қамтамасыз етуге және азаматтардың өтініштерін азайтуға бағытталған, - деп атап өтті Ернар Сейдімбек.