Денсаулық формуласы

«Семей қаласының орталықтандырылған кітапхана жүйесі» КММ-нің №12 кітапхана-бөлімшесінің қызметкерлері «Ой-сана» білім беру орталығының тәрбиеленушілерінің қатысуымен ұлт саулығы - еліміздің негізгі приоритеті бағытына  арналған «Денсаулық формуласы» атты маңызды диалог өткізді.

Іс-шараға «Platforma» би студиясының хореограф-тренері Жания Асқарқызы Ержанова қатысты.

Іс-шара барысында Жания Асқарқызы денсаулықты сақтаудың негізгі қағидалары: дұрыс тамақтану, күн тәртібін сақтау, дене белсенділігінің маңызы және спорттың адам өміріндегі рөлі туралы айтты. Сонымен қатар өзінің еңбек жолы мен жетістіктері жайлы әңгімелеп, жастарды белсенді өмір салтын ұстануға шақырып, жеңіл дене жаттығулары мен би қимылдарын үйретіп, белсенді қимыл-қозғалыстың адам денсаулығына пайдасын көрсетті.

Әрі қарай қатысушыларға арналған қызықты ойындар ұйымдастырылып, денсаулыққа қатысты сұрақ-жауаптар мен танымдық тапсырмалар өткізілді. Балалар пайдалы және зиянды әдеттерді ажырату, дұрыс тамақтану және жеке бас гигиенасы туралы білімдерін ортаға салды.

Шара қорытындысында «Салауатты өмір-жарқын болашақ» атты кітап көрмесі таныстырылды.

Қалалық орталық кітапхана