Естеліктің ащы жылдары

«Семей қаласының орталықтандырылған кітапхана жүйесі» КММ-нің №12 кітапхана-бөлімшесінің қызметкерлері Семей қаласындағы 44793 әскери бөлімі сарбаздарының қатысуымен 31 мамыр - Қазақстандағы Саяси қуғын-сүргін және ашаршылық құрбандарын еске алу күніне орай «Естеліктің ащы жылдары» атты естелік-лента өткізді.

Кітапхана қызметкері шара басында атаулы күннің маңыздылығына тоқталып, ХХ ғасырдың ауыр кезеңдері – саяси қуғын-сүргін мен ашаршылық жылдары туралы қысқаша ақпарат берді. Сондай-ақ жазықсыз жапа шеккен жандардың тағдыры мен олардың ел тарихындағы орны туралы әңгімеледі.

Әрі қарай тақырыпқа сай бейнебаян көрсетіліп, қатысушылар өткен тарихтың қасіретті беттерімен танысты.

Іс-шара барысында сарбаздарға саяси қуғын-сүргінге ұшыраған ақын-жазушылардың еңбектерін насихаттау мақсатында спиральді оқыту әдісі қолданылды. Сонымен қатар шығармаларының атаулары бойынша сөздерден сөзжұмбақ құрастыру арқылы «Тарсиа» әдісі пайдаланылды.

Шара қорытындысында саяси қуғын-сүргін мен ашаршылық тақырыбындағы тарихи, деректі және көркем шығармалар қойылған «Естеліктің ащы жылдары» атты кітап көрмесі ұйымдастырылып, әдебиеттерге шолу жасалды.

Қалалық орталық кітапхана